لاتۆيا 1- قاڭتاردان باستاپ ەۋرووداققا ءتوراعالىق ەتە باستادى
10:56, 03 - قاڭتار 2015
استانا. قازاقپارات - 2015-جىلدىڭ 1- قاڭتارىنان باستاپ لاتۆيا جارتى جىل بويى ەۋروپالىق وداققا ءتوراعالىق ەتەتىن بولدى.
لاتۆيانىڭ بۇل ءتوراعالىعىنىڭ باستى قاعيداتتارى وداق ەكونوميكاسىنىڭ باسەكەگە قابىلەتتىلىگىن ارتتىرۋعا نەگىزدەلگەن، ونىڭ ىشىندە ەكونوميكالىق ءوسىم مەن جۇمىسپەن قامتۋدى جاقسارتۋعا باعىتتالعان ينۆەستيتسيالاردى قاراستىراتىن «يۋنكەر جوسپارىن» جۇزەگە اسىرۋ دا بار. نەگىزگى باسىمدىقتار رەتىندە ساندىق تەحنولوگيالار نارىعى دا، حالىقارالىق ساياساتتىڭ جاھاندىق دەڭگەيدەگى سۋبەكتىسى رەتىندەگى ە و- تىڭ الەمدەگى ءرولىن ارتتىرۋ دا كوزدەلىپ وتىر.
ەۋرووداقتىڭ حالىقارالىق دارەجەسىنە كەلسەك، ە و- تى «شىعىستىق ارىپتەستىك» ساياساتىندا ىلگەرىلەتۋ ماقساتى دا قويىلعان. بۇل باعدارلاماعا قاتىساتىن ەلدەردىڭ سامميتى مامىر ايىندا ريگادا وتەدى، دەپ حابارلايدى روسبالت.