بۇگىنگە دەيىن 1 ميلليوننان استام قانداستارىمىزدى سىرتتان الىپ كەلدىك - ق ر پرەزيدەنتى

استانا. قازاقپارات - جىل سايىن قازاقستانداعى حالىق ءبىر قالاعا كوبەيىپ وتىراتىن بولسا، بۇل ءبىر ۇلكەن عانيبەت.

 بۇل تۋرالى كەشە قازاقستان پرەزيدەنتى نۇرسۇلتان نازاربايەۆ ءبىرقاتار قازاقستاندىق ب ا ق وكىلدەرىمەن سۇحباتى بارىسىندا ءمالىم ەتتى.

 حالىقتىڭ دەموگرافيالىق احۋالىنا توقتالعان مەملەكەت باسشىسى سوڭعى ۋاقىتتاردا حالىق سانى ارتىپ وتىرعاندىعىن تىلگە تيەك ەتتى.

«ويلاپ قارايتىن بولساق، 1991 - جىلدان 1995 - جىلعا دەيىن قازاقستاننان 3,5 ميلليون حالىق كەتىپ قالدى. ول كەزدە ءبىزدىڭ حالقىمىزدىڭ سانى 14 ميلليون ادامعا دەيىن ءتۇستى. سەبەبى تولقىمالى جاعداي بولدى، حالىق جاعدايىمىز قالاي بولادى دەپ، كەبىرەۋلەرى رەسەيگە كوشتى، نەمىستەر گەرمانياعا كوشتى، گرەتسياعا، يزرايلگە قونىس اۋدارىپ كەتتى. ەشقايسىسىن دا ۇستاعانىمىز جوق. حالىق 14 ميلليوننان ءتۇسىپ كەتتى. قازىر جاعداي جاساعانىمىزدىڭ ارقاسىندا قايتادان ورنىنا كەلىپ، 17 ميلليوننان استى. ونىڭ ىشىندە 1 ميلليوننان استامى قانداستارىمىزدى سىرتتان الىپ كەلدىك. ولار بالالى بولىپ، كوبەيىپ جاتىر. سونان كەيىن قازاقستاننىڭ ىشىندەگى جاعدايدى تۇزەپ، بالالارعا قام جاسادىق. بۇل، ارينە، قۋانىشتى جاعدايلار»، -   دەدى ول.

 ونىڭ اتاپ كورسەتكەنىندەي، ءبىر جىلدىڭ ىشىندە 265 مىڭ بالا مەكتەپ تابالدىرىعىن اتتاپ، ءبىرىنشى سىنىپقا باردى.  «ول ءبىر ورال سياقتى ءبىر قالانىڭ تۇرعىندارىمەن پارا- پار. جىل سايىن قازاقستانداعى حالىق ءبىر قالاعا كوبەيىپ وتىراتىن بولسا، بۇل ءبىر ۇلكەن عانيبەت. قازاقستان تاريحىندا العاش رەت 700 مەكتەپ سالىندى. دەنساۋلىق ساقتاۋ مەكەمەلەرى 600 دەن استامى سالىندى. الدە دە 3 اۋىسىمدا وقىتاتىن مەكتەپتەر بار، ەسكىرگەن مەكتەپتەر بار. سوندىقتان قازاقتا ءسوز بار عوي،  «ءبىر قوزى تۋسا، ءبىر ءتۇپ جۋسان ارتىق وسەدى»  دەگەن. ءار بالانىڭ ءوز نەسىبەسى بار»، -   دەدى ن. نازاربايەۆ.