تۇركيانىڭ «زامان» گازەتى قازاقستانعا ارنالعان نومەرىن 1 ميلليون دانامەن شىعاردى
ارنايى باسىلىمعا قازاقستاننىڭ جەتىستىكتەرى، ق ر پرەزيدەنتىنىڭ قازاقستان حالقىنا جولداۋىنىڭ نەگىزگى قاعيدالارى، «ەكسپو-2017» كورمەسىنە ەلدىڭ دايىندىعى جانە استانانىڭ ەرەكشەلىكتەرى تۋرالى ماقالالار مەن اقپاراتتىق- تانىمدىق ماتەريالدار ەندى.
گازەتتىڭ ءنومىرى ق ر پرەزيدەنتى ن. نازاربايەۆ جولداۋى «نۇرلى جولدىڭ» نەگىزگى قاعيدالارى جانە دە ەلباسىنىڭ سويلەگەن سوزدەرىمەن باستالادى.
كەلەسى تاراۋلاردا قازاقستاننىڭ تۇركياداعى ەلشىسى جانسەيىت تۇيمەبايەۆتىڭ جانە زيالى قاۋىم وكىلدەرىنىڭ ماقالالارى جاريالانىپ، قازاقستاننىڭ تاۋەلسىزدىك جىلدارداعى جەتىستىكتەرى، قازاقستاننىڭ دامۋ باعدارلامالارى، قازاق حاندىعىنىڭ 550 جىلدىعىن اتاپ وتۋگە دايىندىق ءىس- شارالارى، ەلدىڭ «ەكسپو-2017» كورمەسىن وتكىزۋگە ازىرلىگى جانە ت. ب. ماسەلەلەر جوعارى باعالاندى.
«ەكسپو-2017» كورمەسىنە دايىندىق تاقىرىبى باسىلىمنىڭ بولەك تاراۋىندا ورىن الدى. گازەتتىڭ رەداكتورلارى قازاقستاندا قىزمەت
ەتىپ جاتقان قازاق- تۇرىك ۋنيۆەرسيتەتتەر مەن ليسەيلەردىڭ ماڭىزدى ءرولىن اتاي وتىرىپ، ءبىلىم بەرۋ سالاسى بويىنشا قازاق- تۇرىك ىنتىماقتاستىعىنا ەرەكشە نازار اۋداردى. جالپى ارنايى باسىلىم تۇرىك قوعامىنىڭ قازاقستانعا جانە ەلىمىزدىڭ جەتىستىكتەرىنە قاتىستى قىزىعۋشىلىعىن تانىتتى.
«زامان» گازەتى - تۇركيانىڭ ەڭ كوپ تارالىمدى باسىلىمى، كۇندەلىكتى نەگىزدە 1 ميلليون دانامەن ەرەكشەلەنەدى. گازەت تۇركيانىڭ جالپى اۋماعى بويىنشا، سونىمەن قاتار امەريكا، ەۋروپا، تاياۋ شىعىس، ورتالىق ازيا ەلدەرىندە تارايدى.