بيىل ەلىمىزدە 19 مىڭ ستۋدەنت جاتاقحاناسىز قالادى
«توسەك- ورىننىڭ رەسمي تاپشىلىعى 19 مىڭ ورىن. ونىڭ باسىم بولىگى، ياعني 13 مىڭى الماتى قالاسىنا تيەسى. مۇنان بولەك استانادا – 2200، سولتۇستىك قازاقستان وبلىسىندا -2318، اباي وبلىسىندا - 1100، تۇركىستان وبلىسىندا 987 ورىن جەتىسپەيدى»، - دەدى ايسۇلۋ ەرنيازوۆا ەلوردادا AMANAT پارتياسىنىڭ عيماراتىندا وتكەن بريفينگتە.
ونىڭ دەرەگىنشە، ەلىمىزدە 600 مىڭنان استام ستۋدەنت بار. ال رەسپۋبليكانىڭ بارلىق وڭىرىندەگى جاتاقحانالار سانى - 663. ونىڭ 250 ءى ۋنيۆەرسيتەتتەرگە، 413ءى كوللەدجدەرگە قارايدى.
بۇعان دەيىن ەلىمىزدىڭ 11 وڭىرىندە ستۋدەنتتەر جاتاقحاناسى تەكسەرىلىپ جاتقانىن جازعان ەدىك.
ۋنيۆەرسيتەتتەر بويىنشا تەكسەرىلگەن جاتاقحانانىڭ 70 ءسىن جاقسى دەپ ايتۋعا بولادى. 39 ى ورتاشا، 2 جاتاقحانادا قۇرىلىس ءجۇرىپ جاتىر.
كوللەدجدەر بويىنشا جالپى 126 جاتاقحانانىڭ 75 ءى جاقسى. 36 سىنىڭ جاعدايى ورتاشا، 13 ءىنىڭ جاعدايى ناشار، 2 جاتاقحانادا تۇرۋ مۇمكىن ەمەس.