ىشكى ىستەر ءمينيسترى ۇلتتىق ۇلاننىڭ ارنايى جاساعىنداعى 19 جاۋىنگەرگە كۇرەڭ بەرەت تابىستادى
بيىل سىناقتارعا 80-نەن استام اسكەري قىزمەتشى قاتىستى. ەمتيحانعا رۇقسات الۋ ءۇشىن ولار تەوريالىق تەستىلەۋدەن ءوتىپ، دەنە شىنىقتىرۋ، بيىكتىكتەگى دايىندىق، ارنايى قۇرىلعىلارمەن تومەن ءتۇسۋ، بايلانىس دايىندىعى، مەديتسينالىق دايىندىق بويىنشا سىناق تاپسىردى. كۇرەڭ بەرەتكە ۇمىتكەرلەردىڭ قورىتىندى كەزەڭىندە اۋا تەمپەراتۋراسى 40 گرادۋستان جوعارى بولدى. سوعان قاراماستان ولار تاۋلى ايماقتا 30 شاقىرىم قاشىقتىقتى جۇگىرىپ ءوتتى.
- قاتتى ىستىققا قاراماستان ۇمىتكەرلەر «زيگزاگ» جانە «پلاستۋن» ءتارىزدى قوزعالۋ نورماتيۆتەرىن تاپسىردى. وكوپ قازۋ بويىنشا سىنعا ءتۇستى. «جارالانعان» جولداسىن 100 مەترگە سۇيرەپ اپاردى. سودان كەيىن گازعا قارسى ماسكا كيگەن قالپىندا اۋاسى لاستانعان 400 مەتر جەردى ەڭسەردى. سودان كەيىن باستاپقى جۇگىرۋ مانەرىن قايتا جالعاستىردى. مۇنىڭ ءبارى بەلگىلەنگەن ۋاقىتتا جانە بەلگىلەنگەن نورماتيۆتەرگە ساي جۇرگىزىلدى، - دەدى «زۆەر» اتتى «بۇركىت» ارنايى جاساعىنىڭ جاۋىنگەرى.
سىناق كەزىندە ءار ۇمىتكەر فيزيكالىق جانە پسيحولوگيالىق كۇيزەلىستەرگە تاپ بولدى. ولار كەزىككەن قيىندىقتاردى جەڭىپ، مارەگە جەتۋ ءۇشىن كوماندالىق ءتوزىم، ەرىك- جىگەر مەن ۇيىمشىلدىقتى كورسەتتى. سىناقتىڭ سوڭعى كەزەڭىندە ۇمىتكەرلەر ءۇش مەترلىك بەتون قابىرعالاردى ەڭسەرىپ، سوزىلعان تىكەنەك سىمنىڭ استىندا 200 مەترلىك كەدەرگىلەر جولاعىنان جىلجىپ ءوتتى.
ايتا كەتۋ كەرەك، ۇمىتكەرلەردىڭ كۇيزەلىسكە توزىمدىلىگىن نىعايتۋ ءۇشىن كەدەرگىلەر جولاعىنىڭ جانىندا جارىلىستار ۇيىمداستىرىلىپ، وق اتىلىپ تۇردى. مۇنداي ءادىس جاۋىنگەرلىك اتموسفەرا تۋدىرادى جانە ۇمىتكەرلەردىڭ كۇيزەلىس جاعدايلارىنداعى رەاكتسياسىن تەكسەرەدى.
كەدەرگىلەردەن كەيىن بىردەن ۇمىتكەرلەر جەكپە- جەك ۇرىسقا كىرىستى. الدىمەن ولار ءبىر- بىرىمەن، سودان كەيىن كۇرەڭ بەرەت يەلەرىمەن شايقاستى. اۋىر سوققىلارعا توتەپ بەرگەن جانە ءۇش مينۋتتىق ءۇش راۋندقا شىداپ بەرگەن ۇمىتكەر عانا كۇرەڭ بەرەت الا الادى.
- بۇل سىناقتان ءوتۋ مەن ءۇشىن ۇمىتىلماس تاجىريبە بولدى. شەرۋدەن جانە كەدەرگىلەردەن وتكەننەن كەيىن مەن جەڭىسكە ۇمتىلعان قارسىلاستارمەن بەتپە- بەت كەلدىم. جەكپە- جەك كۇرەڭ بەرەتكە جەتۋ جولىنداعى سوڭعى سىناق بولدى. شارشاۋ مەن اۋىرسىنۋعا قاراماستان كۇرەسۋگە تىرىستىم. كۇرەڭ بەرەت يەلەرىمەن شايقاسقا ءتۇسۋ وڭاي بولعان جوق. دەگەنمەن بويداعى ادرەنالين سەزىمى مەنى العا جەتەلەپ وتىردى. ناتيجەسىندە بارلىق ءۇش راۋندقا دا توتەپ بەرە الدىم، - دەدى «ريچي» لاقاپ اتىمەن جۇرگەن اسكەري قىزمەتشى.
كەيىنىرەك، سالتاناتتى جاعدايدا، بارلىق سىناقتاردان ءساتتى وتكەن جانە سوڭعى كەزەڭنىڭ قيىندىقتارىنا توتەپ بەرگەن 19 ۇمىتكەرگە قاستەرلى كۇرەڭ بەرەت تابىستالدى.
- سىزدەر بۇگىن فيزيكالىق جانە مورالدىق جاعىنان كۇردەلى سىناقتاردان وتتىڭىزدەر. سىزدەردىڭ ادالدىقتارىڭىز بەن كاسىبيلىكتەرىڭىز جاس ۇرپاق ءۇشىن جانە بارلىق ءتارتىپ ساقشىلارىنا ۇلگى. بۇل سىزدەردىڭ كومانديرلەرىڭىزدىڭ، نۇسقاۋشىلارىڭىزدىڭ جانە ءسىز اسكەري قىزمەت وتكەرىپ جاتقان ۇجىمنىڭ قولداۋى مەن دايىندىعىنىڭ ارقاسىندا قول جەتكىزگەن جەتىستىكتەرىڭىز بولىپ سانالادى. جوعارى شەبەرلىك پەن بىرلەسكەن قىزمەت كەز كەلگەن سىن- تەگەۋرىندەر مەن قاۋىپ- قاتەرلەرگە توتەپ بەرۋگە، وتانىمىزدى قورعاۋعا دايىن ەليتالىق بولىمشەلەردى قۇرۋعا ىقپال ەتەدى، - دەدى قر ىشكى ىستەر ءمينيسترى مارات احمەتجانوۆ.
بيىل «بۇركىت» ارنايى ماقساتتاعى بولىمشەلەرىن دامىتۋعا قوسقان ەرەكشە ۇلەسى ءۇشىن كۇرەڭ بەرەت ىشكى ىستەر ءمينيسترى مارات احمەتجانوۆقا دا تابىس ەتىلدى.
ايتا كەتۋ كەرەك، «بۇركىت» ارنايى بولىمشەسىنىڭ جاۋىنگەرلەرىنىڭ ەمتيحانى مەن دايىندىق دەڭگەيى وزبەكستان رەسپۋبليكاسىنان كەلگەن ارىپتەستەر تاراپىنان دا جوعارى باعاعا يە بولدى. ولار ۇلتتىق ۇلان قولباسشىلىعىنا قازاقستاندىق ارنايى جاساقتىڭ ومىرىندەگى ماڭىزدى تاريحي ساتتەردىڭ بىرىنە كۋا بولۋعا مۇمكىندىك بەرگەنى ءۇشىن ريزاشىلىقتارىن ءبىلدىردى. جىل سايىن اسكەري قىزمەتشىلەردىڭ جاۋىنگەرلىك جانە ارنايى دايارلىق دەڭگەيىن ارتتىرۋ، ولاردىڭ ارناۋلى ءبىلىم مەن داعدىلاردى الۋى جانە يگەرۋى ءۇشىن بولىمشەنىڭ جاۋىنگەرلەرى ءۇشىن قۇرمەتتى دەپ سانالاتىن كۇرەڭ بەرەت تاعۋ قۇقىعىنا بىلىكتىلىك سىناقتارى جۇرگىزىلەدى. بۇل ءىس- شارالار جىلدىڭ ءار مەزگىلىندە، سونداي- اق جەر بەدەرىنىڭ ءارتۇرلى ايماقتارىندا وتكىزىلەدى.