19 جىل بويىنا جات جەردە قۇجاتسىز كۇن كورگەن اسەل ەلدەن نە سەبەپتى كەتىپ قالعانىن، اتا-انالارىمەن نەلىكتەن بايلانىسقا تۇسە الماعانىن ايتىپ بەردى.
«2000 -جىلدار وتباسىمىز ءۇشىن قيىنداۋ كەزەڭ بولدى. الەۋمەتتىك جاعدايىمىز اسا ءبىر كەرەمەت ەمەس ەدى. قازىر ويلانىپ وتىرسام، ول كەزدە كوپ وتباسىلار قينالعان سياقتى. مەن سول كەزدە پويىزدا تاماق ساتىپ ءجۇردىم. ءبىر ستانسادان وتىرىپ، ەكىنشى ستانساعا دەيىن سۋ، ءتاتتى سۋسىندار، ءتاتتى بولكەلەر سياقتى تاماقتاردى ساتاتىنمىن. ءسويتىپ ءناپاقا تاۋىپ جۇرگەنىمدە دۋشانبەگە دەيىن اپاراتىن پويىزدا ءبىر تاجىك جىگىتىمەن تانىستىم. جاپ-جاسپىن عوي. الگى جىگىتتىڭ مەنى «ۇناتىپ قالدىم» دەگەنىنە سەنىپ، ونىمەن بىرگە قول ۇستاسىپ، دۋشانبەدەن ءبىر اق شىقتىم. ەكەۋمىز بىرگە تۇردىق. ول ماعان ۇيلەنگىسى كەلەتىنىن ايتتى. ءبىراق، اتا-اناسى رۇقسات بەرمەدى. تاجىكتەردە ول جاعىنان اتا داستۇرلەرى قاتال ەكەن. جىگىتتەرىنە باسقا ۇلتتىڭ قىزىن العىزبايدى. ءسويتىپ مەن ول جىگىتتىڭ ەكىنشى ايەلى ەسەبىندە بولدىم. ماعان بولەك پاتەر جالداپ بەردى. مەن سوندا تۇرىپ جاتتىم» دەيدى اسەل.
جات جەردە ءجۇرىپ، تاعدىردىڭ تالاي تەپەرىشىن كورگەن اسەل ءبىر رەت جۇكتى بولعانىن دا ايتتى. الايدا بالا دۇرىس جەتىلمەي، اسەلگە وتا جاسالعان.
«قازاقستاننان كەتەردە جەكە باسىمدى كۋالاندىراتىن قۇجاتىمدى الىپ ۇلگەرمەگەن ەدىم. ءارى ۇلكەن ومىرگە دايىندىعىم دا جوق. قازاقستانعا كەرى قايتقىم كەلگەنمەن، ورالۋدىڭ امالىن تابا المادىم. ءتۇرلى-ءتۇرلى جاعدايلاردى باستان وتكەردىم. ءتۇرلى ءدامحانالاردا داياشى بولىپ جۇمىس ىستەدىم. بارا-بارا قازاق ءتىلىن دە ۇمىتا باستادىم. ءتىپتى، ەلگە ورالامىن دەگەن ءۇمىتىم ءبىرجولا ءسوندى» دەيدى اسەل.
اسەل ادەتتەگىدەي داياشى بولىپ جۇرگەنىندە قازاقستاندىق ازامات ول جۇمىس ىستەيتىن ءدامحاناعا تاماقتانۋعا كەلەدى. ول اتىراۋلىق كاسىپكەر نۇرقاسىم حامزا ۇلى ەدى. اسەلمەن سويلەسە كەلە ونىڭ قازاقستاندىق ەكەنىن جانە ەلگە قايتقىسى كەلەتىنىن ەستىگەننەن كەيىن، كاسىپكەر وتانداسىمىزعا كومەك قولىن سوزادى.
كاسىپكەر نۇرقاسىم حامزا ۇلىنىڭ وتىنىشىمەن ىسكە سول كەزدەگى سەناتور سارسەنباي ەڭسەگەنوۆ ارالاسىپ، سىرتقى ىستەر مينيسترلىگى، تاجىكستانداعى قازاقستان ەلشىلىگىنە شىعىپ، اسەلدى ەلگە الىپ كەلۋگە ىقپال ەتەدى.
«تۋعان ەلىمە ورالعانىما قۋانىشتىمىن. ءالى كۇنگە دەيىن شۇكىرشىلىگىمدى ايتىپ وتىرامىن. وكىنىشكە وراي، اكەم مەنىڭ ءىز-ءتۇزسىز جوعالعانىما قۇسا بولىپ، ومىردەن ءوتىپ كەتىپتى. اكەمدى كورە المادىم. قازىر انامنىڭ قاسىندامىن. انامنىڭ اس-سۋىن دايىنداپ، قىزمەت قىلىپ جۇرگەنىمە باقىتتىمىن» دەدى اسەل.
قازىر اسەل اتىراۋداعى مەيرامحانالاردىڭ بىرىنشە داياشى بولىپ قىزمەت ىستەيدى. ءوزىنىڭ باسىنان وتكەن قيلى تاعدىرى باسقالارعا ساباق بولعانىن قالايدى.
«قىز بالالارعا اتا-اناڭىزدى سىيلاڭىزدار، قادىرىن بىلىڭىزدەر دەگىم كەلەدى. سول كەزدە تاجىك جىگىتىنىڭ ەتەگىنەن ۇستاپ، ارتقا قاراماي كەتكەنىمە وكىنەمىن. ەگەر باسىمنان ول جاعداي وتپەگەندە، ءبىلىم الىپ، قازىر ءبىر ماماندىقتىڭ يەسى بولىپ وتىرار ەدىم. قىز بالالار ءبىلىم الىپ، ءوزىن دامىتۋعا جاستايىنان ءمان بەرسە ەكەن» دەدى اسەل بىزبەن قوشتاسارىندا.
اتا-اناسى 19 جىل بويىنا ىزدەۋ سالعان اسەل 2019 -جىلى ەلگە امان-ەسەن ورالعان بولاتىن. اداسىپ ءجۇرىپ، ءۇيىرىن تاپقان قاراكوزىمىزدىڭ باسىنان كەشكەن جايى وسىنداي...
Massaget.kz