شەكارا ماڭىنداعى 19 مىڭ گەكتار جەرىمىزدى قىرعىزدار پايدالانىپ وتىر - سەنات دەپۋتاتى
ونىڭ ايتۋىنشا، قازاقستان مەن قىرعىزستان اراسىنداعى مەملەكەتتىك شەكارانى دەماركاتسيالاۋ تۋرالى شارتقا قول قويىلدى جانە راتيفيكاتسيالاندى، ءبىراق شەكارالىق قورشاۋلاردى ورناتۋ پروتسەسى ءالى اياقتالعان جوق.
«مۇنىڭ جەرگىلىكتى تۇرعىندارعا قانداي قيىندىق تۋعىزاتىنىن الماتى وبلىسى كەگەن اۋدانىنىڭ قوعامدىق كەڭەسىنىڭ ءتوراعاسى ايتىپ بەردى. قازاقستان تاراپىنان شەكارا سىزىعىنا تىكەلەي جاناساتىن ءبىرىنشى شەپتىڭ ينجەنەرلىك بوگەۋىشتەرى جوق. تەك ەكىنشى شەبى جول جيەگىنە پاراللەل ورناتىلعان بوگەۋىشتەرمەن بەلگىلەنگەن. وسىلايشا، ءبىرىنشى جانە ەكىنشى شەپتەردىڭ اراسىنداعى قازاقستاننىڭ 4 مىڭ گەكتارعا جۋىق اۋىل شارۋاشىلىعى جانە 15 مىڭ گەكتاردان استام ورمان شارۋاشىلىعى جەرلەرىن كەگەن اۋدانىنىڭ شارۋا قوجالىقتارى ءوز ماقساتتارى ءۇشىن پايدالانا الماي وتىر. ويتكەنى تۇرعىندار اراسىندا قاقتىعىستى بولدىرماۋ ءۇشىن قازاقستاندىق شەكاراشىلار ازاماتتارىمىزدى ينجەنەرلىك بوگەتتەردىڭ ەكىنشى شەبى ارقىلى وتكىزۋگە جول بەرمەيدى. سونىڭ سالدارىنان بۇگىنگى كۇنى بۇل جەرلەردى قىرعىزستان ازاماتتارى ءشوپ شابۋ، مال جايۋ ءۇشىن پايدالانۋدا، ويتكەنى كورشى تاراپتا قانداي دا ءبىر بوگەتتەر جوق»، - دەدى نۇرجان نۇرسيپاتوۆ.
وسىعان بايلانىستى اۋىل تۇرعىندارى قازاقستان مەن قىرعىزستان اراسىندا جاسالعان مەملەكەتتىك شەكارانى دەماركاتسيالاۋ تۋرالى شارتتا كورسەتىلگەندەي، ماسەلەنى شەشۋگە جانە جەتىسپەيتىن بوگەت جەلىلەرىن ورناتۋعا جاردەمدەسۋدى سۇرايدى.
«شەكارا قاۋىپسىزدىگىن قامتاماسىز ەتۋ مەن شەكارا ماڭىنداعى ءوڭىر تۇرعىندارىنىڭ قۇقىقتارىن ساقتاۋ ماقساتىندا مەملەكەتتىك شەكارانى شەگەندەۋدى اياقتاۋ جۇمىسىنىڭ بارىسى تۋرالى حابارلاۋدى سۇرايمىز. الماتى وبلىسى كەگەن اۋدانىنداعى شەكارا سىزىعىن قوسا العاندا، بۇكىل مەملەكەتتىك شەكارانىڭ سىزىعى بويىنشا قاجەتتى ينجەنەرلىك-تەحنيكالىق قۇرالداردى، قۇرىلىسجايلار مەن بوگەۋىشتەردى مونتاجداۋعا، تۇرعىزۋعا جانە ورناتۋعا شۇعىل تۇردە قاراجات قاراستىرۋ ماڭىزدى. شەكارا ماڭى اۋداندارى ازاماتتارىنىڭ زاڭدا بەلگىلەنگەن شەڭبەردە شەكارا ايماعى مەن شەكارا بەلدەۋى شەگىندە ورنالاسقان اۋىل شارۋاشىلىعى ماقساتىنداعى جەر ۋچاسكەلەرىن پايدالانۋ قۇقىقتارىنىڭ ساقتالۋىن نازاردان تىس قالدىرماۋدى جانە شەكارالىق كەڭىستىكتە قۇقىقبۇزۋشىلىقتار جاساۋعا ىقپال ەتەتىن سەبەپتەر مەن جاعدايلاردى جويۋدى سۇرايمىز»، - دەدى سەناتور.