ول ءىزباسارلارىن اقىرزامان جاقىنداعانىنا سەندىرىپ، جۇماققا جەتۋ ءۇشىن بالالارىمەن بىرگە اشىعۋعا ۇگىتتەگەن، - دەپ حابارلايدى Reuters اگەنتتىگى.
تەرگەۋ مالىمەتىنشە، ماككەنزي ورمان ىشىندە ءدىني قاۋىمداستىق قۇرعان. ول جاقتاستارىنا تاماقتان باس تارتىپ، اشتان ولسە، جۇماققا باراتىنىن ايتقان. ال بۇيرىعىنا باعىنباعانداردى سىبايلاستارى ۇرىپ-سوعىپ، قورقىتقان. كەيبىر بالالار تىرىدەي جەرلەنگەن.
سۇمدىق وقيعا 2023-جىلى شاكاحولا ورمانىنان جاپپاي ادام مايىتتەرى تابىلعان كەزدە اشكەرەلەندى. قۇقىق قورعاۋشىلاردىڭ دەرەگىنشە، ورماننان 448 ادامنىڭ دەنەسى شىعارىلعان. ال جالپى قۇرباندار سانى 500 گە جەتۋى مۇمكىن.
«بالالار باۋىرلارىنىڭ بىرنەشە كۇن اشىققاننان كەيىن كوز جۇمعانىن ءوز كوزدەرىمەن كورگەن. تاماق نەمەسە سۋ الۋعا تىرىسقانداردى ۇرىپ، قولدارىن بايلاپ، اشتان ءولۋى ءۇشىن ۇيلەرگە قاماپ وتىرعان»، - دەدى سۋديا ديانا كاۆەدزا.
سوت ماككەنزيگە 200 جىل تۇرمە جازاسىن تاعايىندادى. ونىڭ 28 سىبايلاسى دا 10 جىلدان 160 جىلعا دەيىن باس بوستاندىعىنان ايىرىلدى.
قايعىلى وقيعادان التى بالاسىنان ايىرىلعان اكەلەردىڭ ءبىرى: «ەرەسەكتەر ءوز ەركىمەن اشىققان شىعار، ال بالالاردىڭ جازىعى نە؟» - دەپ كۇيىندى.
سوت بارىسىندا بيلىك وكىلدەرىنىڭ سەكتاعا قاتىستى 2017-جىلدان بەرى تۇسكەن ەسكەرتۋلەرگە دەر كەزىندە نازار اۋدارماعانى دا ايتىلدى. سۋديا مۇنداي قايعىلى جاعداي قايتالانباۋى ءۇشىن مەملەكەت تاراپىنان قاتاڭ شارالار قابىلدانۋى قاجەت ەكەنىن اتاپ ءوتتى.