19 مىڭنان استام تاكسي جۇرگىزۋشىسى قىزمەتىن زاڭداستىردى - ەڭبەك ءمينيسترى

استانا. KAZINFORM - قازاقستاندا اۆتوماتتاندىرىلعان جۇمىس ورنىن ەنگىزىپ، ەڭبەك جانە ۇجىمدىق شارتتار جاساسۋدىڭ سيفرلىق فورماتىنا كوشۋ جوسپارلانۋدا. بۇل تۋرالى ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا ايتتى.

«ءبىزدىڭ باسىمدىقتارىمىزدىڭ ءبىرى - ەڭبەك قاتىناستارىن دەكلاراتسيالاۋ. بىرىنشىدەن، كاسىپوداقتاردىڭ اۆتوماتتاندىرىلعان جۇمىس ورنىن ەنگىزىپ، ەڭبەك جانە ۇجىمدىق شارتتار جاساسۋدىڭ تسيفرلىق فورماتىنا كوشۋ جوسپارلانۋدا. وسى زاڭنىڭ ءتيىستى جوباسى ازىرلەنىپ، قازان ايىنىڭ سوڭىنا دەيىن سىزدەردىڭ قاراۋىڭىزعا ەنگىزىلەدى»، - دەدى مينيستر ماجىلىستە «قازاقستاننىڭ ەڭبەك نارىعىن دامىتۋ جانە كادرلىق الەۋەتىن نىعايتۋ» اتتى ۇكىمەت ساعاتىندا.

ونىڭ ايتۋىنشا، پيلوتتىق رەجيمدە ەلەكتروندى فورماتتا 8,7 مىڭنان استام ەڭبەك شارتى جاسالعان. جۇمىسكەرلەردىڭ قۇقىقتارىن قورعاۋعا كومەكتەسەتىن 8 مىڭ ۇجىمدىق شارت تۋرالى دەرەكتەر مينيسترلىكتىڭ اقپاراتتىق جۇيەسىنە ەنگىزىلدى.

ەكىنشىدەن، ەلەكتروندىق شتاتتىق كەستە جوباسى ىسكە اسىرىلۋدا - بۇل اقپاراتتىق جۇيەلەردەگى بارلىق جۇمىس ورىندارىن كودتايدى، ەڭبەك رەسۋرستارىن، جۇمىس ورىندارىن قۇرۋ جانە ەڭبەك جاعدايلارىن قالىپتاستىرۋ پروتسەسىن ءدال ەسەپكە الۋعا مۇمكىندىك بەرەدى.

«ۇشىنشىدەن، وڭايلاتىلعان تىركەۋ ءراسىمىن ەنگىزە وتىرىپ، پلاتفورمالىق جۇمىسپەن قامتۋدى رەتتەۋ زاڭنامالىق تۇردە ەنگىزىلدى. پيلوتتىق جوبا اياسىندا 19 مىڭنان استام تاكسي جۇرگىزۋشىسى قوسىلىپ، 20 ميلليون استام فيسكالدىق چەك جازىلدى. بۇل - پلاتفورمالىق جۇمىسشىلاردى الەۋمەتتىك جانە زەينەتاقىمەن قامسىزداندىرۋ جۇيەسىنە زاڭداستىرۋ مەن ينتەگراتسيالاۋدىڭ ماڭىزدى قادامى»، - دەدى ەڭبەك ءمينيسترى.

بۇعان دەيىن س. جاقىپوۆا ەلدەگى كولەڭكەلى جۇمىس ورىندارى ماسەلەسىن كوتەرگەن ەدى.