ەلوردادا مەرزىمىنەن بۇرىن بوساتىلعان 18 قىلمىسكەر تۇرمەگە قايتا ءتۇستى

استانا. قازاقپارات - ەلوردادا ءىستى بولىپ، جازاسىن وتەپ شىققاندار اراسىندا قىلمىسقا قايتا بارۋ فاكتىلەرى تىركەلدى.

بۇل تۋرالى استانا قالاسى پوليتسيا دەپارتامەنتىنىڭ جەرگىلىكتى پوليتسيا قىزمەتى باسقارماسىنىڭ باستىعى ارمان ايتماعامبەتوۆ ءمالىم ەتتى، دەپ حابارلايدى قازاقپارات ءتىلشىسى.

«بيىل 7 ايدىڭ قورىتىندىسى بويىنشا 10 مىڭ تۇرعىنعا شاققاندا جانە وتكەن جىلدىڭ 7 ايىمەن سالىستىرعاندا قىلمىس ينديكاتورى %6,5 عا تومەن. بۇل جەردە سەرۆيستىك ءتاسىلدى ەنگىزۋ مەن ىلگەرىلەتۋگە باسا نازار اۋدارىلادى. جىل باسىنان بەرى ءىستى بولىپ، ءبىراق جازاسىن تولىق وتەمەگەندەر قايتادان 479 قىلمىس جاسادى. ونىڭ ىشىندە 250 ى پروباتسيا قىزمەتى ەسەبىندە تۇرعان»، - دەدى ارمان ايتماعامبەتوۆ قالالىق ءماسليحاتتا وتكەن وتىرىستا.

ونىڭ ايتۋىنشا، سوتتالعانداردىڭ قايتا قىلمىس جاساۋعا قايتا بارماۋىنا جول بەرمەۋ باعىتىندا كەشەندى ءىس-شارا ىسكە اسىرىلىپ جاتىر.

«جىل باسىنان بەرى شارتتى تۇردە مەرزىمىنەن بۇرىن بوساتىلعان 18 قىلمىسكەر تۇرمەگە قايتا ورالدى. سونداي-اق، 45 ايىپتىعا قاتىستى اكىمشىلىك قاداعالاۋ بەلگىلەندى. اكىمشىلىك قاداعالاۋ رەجيمىن بۇزعانى ءۇشىن 32 ءىستى ازامات جاۋاپقا تارتىلدى. تالداۋ ناتيجەسى كورسەتكەندەي، باس بوستاندىعىنان ايىرۋ ورىندارىنان بوساتىلعانداردىڭ كوبى مۇلىكتىك، سونىڭ ىشىندە ۇساق ۇرلىققا ءجيى بارادى»، - دەيدى ول.