قازاقستاندا 18 مىڭعا جۋىق ەسىرتكىگە تاۋەلدى ناۋقاس تىركەلگەن
وسى ەرىكتى شارانى ءماجبۇرلى شاراعا اۋىستىرۋ ماسەلەسى قارالىپ جاتىر ما؟
ىشكى ىستەر مينيسترلىگىنىڭ اقپارات الاڭىندا وتكەن ونلاين بريفينگىدە ب ا ق وكىلدەرى وسىنداي سۇراق قويدى، دەپ حابارلايدى قازاقپارات ءتىلشىسى.
بۇل سۇراققا ق ر ىشكى ىستەر مينيسترلىگى ەسىرتكى قىلمىسىنا قارسى ءىس-قيمىل دەپارتامەنتىنىڭ باسقارما باستىعى بەرىكحان نۇرعاليەۆ جاۋاپ بەردى.
«ەسىرتكىگە تاۋەلدى ادامداردى ەسەپكە الۋ بويىنشا ايتساق، قۇقىقتىق ستاتيستيكا كوميتەتىنىڭ رەسمي دەرەكتەرى بويىنشا، قازىر 18 مىڭعا جۋىق ەسىرتكىگە تاۋەلدى ناۋقاس ەسەپتە تۇر. ونىڭ 1,5 مىڭى - ايەلدەر، 62 سى جاس ءوسپىرىم. ناركولوگيالىق ەسەپكە الۋ ءتارتىبىن وزگەرتۋ ماسەلەسى دەنساۋلىق ساقتاۋ مينيسترلىگىنىڭ قۇزىرىنداعى ماسەلە»، - دەدى باسقارما باستىعى. اتالمىش شارادا ول ساقشىلاردىڭ جىل باسىنان بەرى ەسىرتكى ساۋداسىمەن شۇعىلدانعان 7 قىلمىستىق توپتىڭ جولىن كەسكەنىن ايتتى.
«وسى جىلدىڭ 9 ايىندا 1929 ەسىرتكى قىلمىسى انىقتالدى. ونىڭ ىشىندە 1136 ەسىرتكى وتكىزۋ فاكتىسى جانە 326 ەسىرتكىنى اسا ءىرى كولەمدە ساقتاۋ فاكتىسى بار. ۇيىمداسقان 7 قىلمىستىق توپتىڭ جولى كەسىلدى. ولاردىڭ ۇستىنەن توپتاردىى قۇردى جانە باسقاردى دەگەن كۇدىكپەن 13 قىلمىستىق ءىس قوزعالدى. 12 توننادان استام ءار-ءتۇرلى ەسىرتكى قۇرالدارى الىندى، ونىڭ ىشىندە 4,9 ك گ گەروين، 9 توننادان استام ماريحۋانا، 376 ك گ گاشيش جانە 107 ك گ سينتەتيكالىق ەسىرتكى بار»، - دەدى باسقارما باستىعى ونلاين بريفينگىدە.
اۆتور: ەسىمجان ناقتىباي