اتاۋلى كۇندەر
شەكاراشىلار كۇنى (قازاقستان رەسپۋبليكاسىنىڭ شەكارا اسكەرى قۇرىلعان كۇن)
1992-جىلعى 18- تامىزدا قازاقستان رەسپۋبليكاسى پرەزيدەنتىنىڭ جارلىعىنا سايكەس، شىعىس شەكارا وكرۋگى نەگىزىندە قازاقستان رەسپۋبليكاسى شەكارا اسكەرى قۇرىلدى.
ەستە قالار وقيعالار
1992-جىلى قازاقستان رەسپۋبليكاسى پرەزيدەنتى ن. نازاربايەۆتىڭ «قازاقستان رەسپۋبليكاسىنىڭ شەكارا اسكەرلەرى تۋرالى» جارلىعى شىقتى.
2005-جىلى الماتىدا «قازشاح» اتتى ءتورت ادامعا ارنالعان شاحمات ويىنىنىڭ تانىستىرىلىمى بولدى. «قازشاح» - قازاقستاندىق ديزاينەر ازات بايسەركەيەۆتىڭ ويلاپ شىعارعان شاحماتتىڭ جاڭا بىر ءتۇرى.
ويىن 64 تور كوزگە بولىنگەن تاقتايدا جۇرەدى. ويىنعا ەكى باقتالاس قاتىسادى، ولاردىڭ قانجىعاسىندا اق جانە قارا ءتۇستى 16 تاس بولۋى كەرەك.
2010 -جىلى ق ر ۇلتتىق بانكى اينالىمعا 500 تەڭگە نومينالدى «وتاۋ كوتەرۋ» مونەتاسىن شىعاردى. مونەتانىڭ وڭ جاق بەتىندە، (اۆەرس) ورتالىق بولىگىندە قازاقستان رەسپۋبليكاسىنىڭ گەربى بەينەلەنگەن. تومەنگى جاعىندا مونەتانىڭ نومينالىن بىلدىرەتىن «500 تەڭگە» جازۋى بار.
وڭ جانە سول جاق سەكتورلارىندا ۇلتتىق ورنامەنت ەلەمەنتىنىڭ اينالىق بەدەرى ورنالاستىرىلعان. اينالا «قازاقستان رەسپۋبليكاسى» جانە «رەسپۋبليكا كازاحستان» جازۋلارى بار. مونەتانىڭ قارسى جاق بەتىندە (ريەۆەرس) «وتاۋ كوتەرۋ» ۇلتتىق سالت-ءداستۇرىنىڭ كورىنىسى بەينەلەنگەن.
تومەنگى جاعىندا مەملەكەتتىك تىلدە «وتاۋ كوتەرۋ» جازۋى اينالدىرا جازىلعان. ەڭ تومەنگى بولىگىندە مونەتانىڭ سوعىلعان جىلىن بىلدىرەتىن «2010» سانى بار.
وڭ جاعىندا - قازاقستان مونەتا سارايىنىڭ تاۋارلىق بەلگىسى مەن مونەتانىڭ دايىندالعان مەتالىن، سىناماسى مەن سالماعىن بىلدىرەتىن - «Ag 925 31,1 gr» تاڭباسى بار. مونەتا 925 سىنامالى كۇمىستەن ازىرلەنگەن، سالماعى - 31,1 گرام، ديامەرترى - 38,61 م م، دايىندالۋ ساپاسى - «proof»، 4 مىڭ دانامەن شىعارىلدى.
2016 -جىلى ريو-دە-جانەيروداعى جازعى وليمپيادا ويىندارىندا 69 كەلى سالماق دارەجەسىندە ونەر كورسەتكەن بوكسشى دانيار ەلەۋسىنوۆ قازاقستان قۇراماسىنىڭ قورجىنىنا التىن مەدال سالدى.
وسىلايشا قازاقستان قاتارىنان ءتورتىنشى وليمپيادادا وسى سالماقتا التىندى ۋىسىنان شىعارماي كەلەدى.
بۇعان دەيىن 2004-جىلى افينادا باقتيار ارتايەۆ، 2008-جىلى بەيجىڭدە باقىت سارسەكبايەۆ، 2012-جىلى لوندوندا سەرىك ساپيەۆ ءدال وسى سالماقتا جەڭىس تۇعىرىنا كوتەرىلگەن بولاتىن.
بوكس تاريحىندا ءبىر ەلدىڭ بوكسشىلارى ءتورت وليمپيادا قاتارىنان ءبىر سالماقتا اتوي سالعانى ەكىنشى رەت قانا قايتالانىپ تۇر.
2017-جىلى IT سالاسىنىڭ مامانى، وڭتۇستىك قازاقستان وبلىسىنىڭ تۋماسى نۇرلان قامبار دومبىرانىڭ ەلەكتروندى نۇسقاسىن جاسادى. ەندى كەز كەلگەن ادام موبيلدىك قوسىمشانى جۇكتەپ الىپ، گادجەتى ارقىلى دومبىرا شەرتە الادى.
2018 -جىلى استانا قالاسىنىڭ ەجەلگى قارۋ-جاراقتار مۋزەيى «بۇقار جىراۋ ءداۋىرى» كورمەسىندە قازاق قولدانبالى ونەرىنىڭ تاماشا ۇلگىلەرىن كورسەتتى.
كورمەگە ابىلاي حان تۇسىنداعى 20 عا جۋىق ەكسپونات قويىلدى. ولاردىڭ اراسىندا باستى وبراز - ابىلاي حاننىڭ ءمۇسىنى دە بار. ونى جاس دارىندى ءمۇسىنشى ايدوس ەسماعامبەتوۆ جاساعان. بۇدان بولەك، XVIII عاسىرعا ءتان قۇرال-سايماندار، ابىلاي حان قىتاي يمپەراتورىنا، ورىس گۋبەرناتورلارىنا جازعان حاتتاردىڭ كوشىرمەلەرى بولدى.
2019 -جىلى 12 جاسار قازاقستاندىق ءجاميلا احمەتوۆا اكادەميالىق ۇلگەرىمى ءۇشىن ا ق ش پرەزيدەنتى دونالد ترامپتىڭ قولى قويىلعان العىس حاتقا يە بولدى.