ولجاس سۇلەيمەنوۆ قازاقستاندىقتارعا 18 ميلليون اعاش وتىرعىزۋدى ۇسىندى
بۇل تۋرالى قوعام قايراتكەرى ەكسپو-2017 حالىقارالىق مامانداندىرىلعان كورمەسىنىڭ فرانسيا سەكسياسىندا وتكەن كەزدەسۋدە ايتتى.
«مەن جەتەكشىلىك ەتەتىن ەكولوگيالىق اليانس وتە جاقسى باستاما كوتەردى. كەلەر جىلى قازاقستان حالقىنىڭ سانى 18 ميلليونعا جەتەدى. سونىڭ قۇرمەتىنە قازاقستان اۋماعىنا 18 ميلليون كوشەت وتىرعىزايىق، ەلىمىزدى كوگالداندىرايىق. ۇسىنىسقا قولداۋ تابىلىپ، اعاش وتىرعىزۋ ناۋقانى باستالىپ تا كەتتى. مەن دە مۇمكىندىك بولعان كەزدەرى ءتۇرلى وبلىستارعا ارنايى بارىپ، اعاش وتىرعىزۋ راسىمىنە قاتىسىپ ءجۇرمىن»، - دەپ اتاپ وتكەن ولجاس سۇلەيمەنوۆ اعاش سانىن كوبەيتۋدىڭ ءتيىمدى جولدارىن دا ايتىپ بەردى.
«بىردەن 18 ميلليون ءتۇپ اعاش وتىرعىزۋ كۇردەلى شىعار. ءبىراق، ماعان مەكتەپ ديرەكتورى بولىپ جۇمىس ىستەگەن زەينەتكەر وتە جاقسى مىسال ايتىپ بەردى. ول مەكتەبىندەگى بارلىق ءبىرىنشى سىنىپ وقۋشىلارىنا اعاش وتىرعىزۋدى مىندەتتەگەن جانە 10 جىل بويى ءوز اعاشىن كۇتىپ-باپتاۋدى تاپسىرعان. ءبىر مەكتەپتە قانشاما وقۋشى ءبىلىم الادى. وسىلايشا، مەكتەپ وقۋشىلارى ون جىل ىشىندە تۇتاس اۋىلدى كوگالداندىرىپ شىققان. مىنە، ءوز ەلىنىڭ ناعىز ازاماتتارى وسىلار»، - دەدى ولجاس سۇلەيمەنوۆ.
ايتا كەتەيىك، بۇگىن ەكسپو-2017 حالىقارالىق مامانداندىرىلعان كورمەسىنىڭ فرانسيا سەكسياسىندا قازاقستاننىڭ ەڭبەك ەرى، قوعام قايراتكەرى، اقىن ولجاس سۇلەيمەنوۆپەن كەزدەسۋ ۇيىمداستىرىلدى.
كەزدەسۋ بارىسىندا ولجاس سۇلەيمەنوۆ جەتى زالدان تۇراتىن فرانسيا پاۆيلونىن ارالاپ كوردى، يۋنەسكونىڭ جۇمىسى، ەكولوگيالىق جانە تابيعاتتى قورعاۋ ماسەلەلەرى جونىندە اڭگىمەلەدى، سونداي-اق 1973-جىلى سەمەي يادرولىق پوليگونىنا قارسىلىق رەتىندە جازعان «ديكوە پولە» ولەڭىن وقىپ بەردى.
اۆتور: ايجان سەرىكجان قىزى