بۇل تۋرالى The Times of India حابارلايدى.
سالتاناتتى شارا گۋدجارات شتاتىنداعى دەرول اۋىلىندا بولعان. بۇل ەلدىمەكەن كوپتەگەن ەجەلگى عيباداتحانالار ارقىلى تانىمال.
«مەن بۇل جۇپقا قوعامنان تىس قالعان جەسىر ايەلدەردىڭ باقىت تىلەگەنىن قالادىم. ولاردىڭ قانداي دا ءبىر مەرەكەگە قاتىسۋى اقىماقتىقتىڭ نىشانى بولىپ سانالادى. ءبىراق، مۇنداي ەسكى نانىم- سەنىمنەن ارىلۋىمىز قاجەت»، - دەيدى كاسىپكەر پاتەل.
بيزنەسمەن ءار جەسىرگە سىيلىق رەتىندە جۇمساق كورپە مەن تال كوشەتىن سىيلاعان. سونىمەن قاتار، كەدەي وتباسىنان شىققان 500 جەسىرگە پاتەل ساۋىن سيىر بايلاپتى.
ءۇندىستاندا جەسىر قالعان ايەلدى ورتەۋ XIX عاسىردا تۇبىرىمەن جويىلسا دا، كۇيەۋىنەن ايىرىلعان ايەل ءبارىبىر قوعامنان بولەكتەنىپ قالادى. ولاردا جەسىردىڭ كولەڭكەسى دە باقىتسىزدىق سىيلايدى دەپ ەسەپتەپ، ولاردى ءارتۇرلى مەرەكەلەرگە شاقىرمايدى.
ولار ۇنەمى ازالى اق ءتۇستى ساري كيىپ، شاشتارىن جايىپ جۇرەدى جانە ولاردىڭ ساندەنۋىنە تىيىم سالىنعان. ولار قالعان ومىرلەرىنىڭ ءبارىن ەرلەرىن جوقتاپ وتكىزۋى ءتيىس دەگەن ۇعىم قالىپتاسقان.