ج. دۇيسەبايەۆ: 188 ميلليون گەكتار جايىلىمى بار قازاقستاندا مال ءورىسى تارىلىپ بارادى
بۇگىن استاناداعى ۇلتتىق مۋزەيدە جەر رەفورماسى جونىندەگى رەسپۋبليكالىق كوميسسيانىڭ ءۇشىنشى وتىرىسىندا ءماجىلىس دەپۋتاتى جەكسەنباي دۇيسەبايەۆ وسىلاي ءمالىم ەتتى.
«قازىر اۋىلدى ەلدى مەكەندەردە مال باعاتىن جەر قالمادى دەگەن ءسوز ءجيى ەستىلەدى. بۇنداي ماسەلەنىڭ ورىن الۋى دا زاڭدىلىق، ويتكەنى، ەلىمىزدە «جايىلىمدار تۋرالى» زاڭ جوق. ەگەر ونداي زاڭ بولسا قازىر كوتەرىلىپ جاتقان ماسەلەلەر ازايار ەدى»، - دەدى ج. دۇيسەبايەۆ. ونىڭ ايتۋىنشا، وسى ولقىلىقتىڭ ورنىن تولتىرۋ ءۇشىن ءبىر توپ دەپۋتات زاڭ جوباسىنا باستاماشىلىق جاساعان. سوعان بايلانىستى كوميسسيا مۇشەلەرىنەن ۇسىنىستار كۇتەتىنىن جەتكىزدى.
«زاڭ جوباسى اۋىلدىڭ توڭىرەگىندەگى، شالعايداعى جايىلىمداردى رەتتەۋگە كۇش سالادى. سوسىن جوسپارلاۋ جۇيەسىن دە جولعا قويۋ كەرەكتىگى قامتىلماق. ماسەلەن، اۋىلدىڭ ىرگەسىنە قانشا مال باعىلۋى كەرەك؟ ەلدى مەكەندەردە قانشا مال ۇستالىپ، قانشاسى جايلاۋعا شىعارىلۋى كەرەك؟ مىنە، وسىنىڭ ءبارىن زاڭدا قامتىعىمىز كەلەدى. ول وڭاي شارۋا ەمەس. دەگەنمەن، وسى زاڭدى قابىلداساق، ءبىز كوپتەگەن تۇيتكىلدى ماسەلەنى شەشەتىن ەدىك»، - دەدى ج. دۇيسەبايەۆ.
بۇدان بولەك، دەپۋتات جەردى ءتيىمدى پايدالانۋدىڭ تەتىگى رەتىندە وعان مەنشىكتىڭ ەنگىزىلۋى كەرەكتىگىنە دە نازار اۋدارتتى. «وكىنىشكە قاراي، قازاقستاندا 100 ميلليوننان استام گەكتار جەر قولدانىسسىز قالىپ، اينالىمعا ەنبەي وتىر. نەگە؟ ويتكەنى، قاراجات جوق. قاراجات بولماعان سوڭ جاڭا تەحنولوگيا دا كەلمەيدى، ەڭبەك ونىمدىلىگى دە ارتپايدى، ءونىم دە شىقپايدى. سوندىقتان دا، ونداي تەحنولوگيانى سىرتتان الماساق، قايدان الامىز؟ وسىنى ويلانايىق»، دەدى ول.
اۆتور: قانات مامەتقازى ۇلى