ماۋلەن اشىمبايەۆ: 184 ميلليون گەكتار جايىلىمنىڭ 21 ميلليون گەكتارىن عانا پايدالانىپ وتىرمىز
سەنات سپيكەرى ماۋلەن اشىمبايەۆ «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جايىلىمداردى پايدالانۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» جانە «ق ر سالىق كودەكسى جايىلىمداردى پايدالانۋ ماسەلەلەرى بويىنشا تولىقتىرۋلار ەنگىزۋ تۋرالى» زاڭ جوبالارى نە ءۇشىن ازىرلەنىپ جاتقانىن ءتۇسىندىردى.
«قازىرگى تاڭدا حالقىمىزدىڭ 40 پايىزدان استامى اۋىلدى جەردە تۇراتىنى بەلگىلى. ونىڭ كوبىنىڭ نەگىزگى تابىسى دا، كۇنكورىس كوزى دە قولىنداعى جەكە مالى دەسەك، ارتىق ايتقاندىق بولا قويماس. الايدا سوڭعى جىلدارداعى جايىلىمنىڭ تاپشىلىعى اۋىل تۇرعىندارى ءۇشىن ۇلكەن ماسەلەگە اينالىپ وتىر. مەملەكەت باسشىسى 2021 -جىلعى جولداۋىندا وسى ماسەلەگە ارنايى توقتالعانى بەلگىلى. سول كەزدە قاسىم- جومارت كەمەل ۇلى جايىلىمدىق جەرلەردى ءتيىمدى پايدالانۋعا باسا ءمان بەردى. سونداي- اق، جەكە قوسالقى شارۋاشىلىقتاردىڭ مالىن جايىلىمدىق جەرمەن قامتاماسىز ەتۋ ماسەلەسىنە ايرىقشا نازار اۋدارۋ قاجەتتىگىن ايتتى»، - دەدى سەنات ءتوراعاسى.
ماۋلەن اشىمبايەۆتىڭ مالىمەتى بويىنشا، قازاقستان جايىلىم جەر رەسۋرستارىنىڭ كولەمى بويىنشا الەمدە التىنشى ورىن الادى.
«ەلىمىزدە جايىلىم جەرلەرىنىڭ جالپى اۋدانى - 184,3 ميلليون گەكتارى. ءبىراق بۇگىنگى تاڭدا وسى كولەمنىڭ 21 ميلليون گەكتارىندا عانا جەكە قوسالقى شارۋاشىلىقتاردىڭ مالىن جايۋعا مۇمكىندىك بار. سونىمەن قاتار، ەلىمىزدەگى جايىلىمدىق جەرلەردىڭ ونىمدىلىگى مەن ساپاسىنىڭ ناشارلاۋى دا ۇلكەن ماسەلە بولىپ وتىر. وعان جايىلىمدا جايىلاتىن مال باسىنىڭ شەكتى دەڭگەيدەن اسىپ كەتۋى ءوز سالدارىن تيىگىزۋدە. القاپتاردى شامادان تىس قارقىندا پايدالانۋ جانە جايىلىم جۇكتەمەسىن ساقتاماۋ ەكولوگيالىق تەپە- تەڭدىكتى بۇزىپ وتىر. بۇل جەمشوپ كولەمىنىڭ تومەندەۋىنە عانا ەمەس، جەردىڭ توزۋىنا، ەروزيانىڭ ارتۋىنا اكەلىپ سوقتىردى»، - دەدى سەنات سپيكەرى.
اۆتور: ەسىمجان ناقتىباي