الەم اپتا ىشىندە: «مۇسىلمان باۋىرلار» ۇيىمىنىڭ 183 جاقتاسى ءولىم جازاسىنا كەسىلدى
ماسەلەن، گرەكيانىڭ سۋ جاڭا ۇكىمەت باسشىسى الەكسيس تسيپراس قىزمەتىنە كىرىسە سالا، ەۋروپا ەلدەرىنە ساپارىن باستاپ جىبەرسە، وسى دۇيسەنبى كۇنى مىسىردىڭ گيزا قالالىق سوتى ەلدە شەكتەۋ قويىلعان «مۇسىلمان باۋىرلار» ۇيىمىنىڭ 183 جاقتاسىن ءولىم جازاسىنا كەستى. سونىمەن قاتار وسى اپتادا تايۆاندا اۋە كەمەسىنىڭ اپاتقا ۇشىراۋ ءساتى بەينەلەنگەن بەينەتاسپا عالامتوردا دۇربەلەڭ تۋدىردى دەسەك تە بولادى.
تسيپراستىڭ ەۋروپا ەلدەرىنە ساپارى
وتكەن اپتادا دا عانا سايلاۋدا پارتياسى جەڭىسكە جەتىپ، ەل بيلىگىن قولعا العان ا. تسيپراس ەۋروپا ەلدەرىنە ساپارىن ەڭ الدىمەن كيپر مەن بريۋسسەلگە جاساسا، ءدال وسى مەزەتتە گرەكتسيانىڭ قارجى ءمينيسترى ياننيس ۆارۋفاكيس پاريج، لوندون، ريم جانە بەرليندە ءبىرقاتار كەزدەسۋلەر وتكىزدى.
ساپار بارىسىندا گرەك باسشىلىعى «ۇشتىك» الدىنداعى نەسيەلىك مىندەتتەمەلەرىن ورىنداۋعا دايىن ەكەندىكتەرىن ايتىپ، قوسىمشا نەسيە قاجەتسىنىپ وتىرماعاندىقتارىن مالىمدەدى. سونىمەن قاتار رەسەي تارابىنىڭ قارجىلىق كومەگىنەن دە باس تارتقان گرەكيا ەۋروايماقتىڭ تۇتاستىعىن ساقتاۋعا پەيىلدى ەكەندىكتەرىن دە ءبىلدىردى.
قازىرگى ۋاقىتتا سيريزا كوشباسشىلارى «ۇشتىكپەن» ىنتىماقتاستىقتان تولىق كولەمدە باس تارتىپ وتىرعانى بەلگىلى. دەگەنمەن، رەسمي افينا كرەديتورلارمەن اراداعى سۇحباتتاستىقتى ەكىجاقتى دەڭگەيدە قالىپتاستىرۋعا نيەتتى. وسىلايشا، سيريزا كوشباسشىلارىنىڭ ەۋروپالىق ساپارىنىڭ العاشقى ناتيجەلەرى ەلدىڭ ەۋروپاعا باعىت العان باعدارى تۇبەگەيلى وزگەرىسكە ۇشىرامايتىندىعىن كورسەتىپ وتىر.
گرەكيا ۇكىمەتىنىڭ جاڭا باسشىلىعى ەۋروپاعا ءوز نيەتتەستىگىنىڭ قارىمتاسى رەتىندە ەكى ۇلگىلى وبليگاتسيالار شىعارۋ جولىمەن «ۇشتىك الدىنداعى» ءوز مىندەتتەمەلەرىن قايتا قۇرىلىمداۋدى ۇسىنۋدا. ونىڭ بىرىنشىسىندە ەۋروايماق ەلدەرىنىڭ گرەكياعا بەرگەن نەسيەلەرىن الماستىرۋ كوزدەلەدى. ياعني، نەسيە تولەمدەرى ەلدىڭ جاپى ىشكى ءونىمى وسىمىنە بايلانىستى جۇزەگە اسىرىلاتىن بولادى. ال ەكىنشى ۇلگىگە سايكەس وتەۋ مەرزىمى كورسەتىلمەگەن وبليگاتسيالار ەۋروپالىق ورتالىق بانكتىڭ يەلىگىندەگى گرەكتەردىڭ قۇندى قاعازدارىن الماستىرۋى قاجەت.
ايتا كەتەرلىگى، ەۋروپالىق ورتالىق بانك، ەۋروپالىق تۇراقتىلىق قورى (EFSF) جانە ە و- نىڭ جەكەلەگەن ەلدەرى گرەكيانىڭ بورىشكەرلىك مىندەتتەمەسىنىڭ جالپى كولەمىنىڭ شامامەن 2/3-نە يەلىك ەتىپ وتىر. وسى سومادان ەوب گرەكياعا 20 ميلليارد ەۋرو ۇسىنسا، ەلدىڭ شامامەن 53 ملرد. ەۋروعا جۋىق قارىزى ە و ەلدەرىنەن ەكىجاقتى كەلىسىم شارتتار اياسىندا الىنعان. الايدا گرەك تارابى زايمنىڭ باسىم بولىگىن EFSF ارقىلى الىپ وتىر. ال ونداعى گەرمانيا ۇلەسى 27، فرانسيا 20, يتاليا 17 پايىزدى قۇرايدى.
ازىرشە تسيپراستىڭ مينيسترلەر كابينەتى ۇسىنعان مۇنداي ۇسىنىسقا نەگىزگى كرەديتورلار كۇدىكپەن قاراۋدا. دەگەنمەن، ەۋروپالىق ەليتانىڭ ەۋروپالىق ينتەگراتسيانى ساقتاپ قالۋ ءۇشىن قانداي دا ءبىر كەلىسىمگە كەلەتىندىگى تۇسىنىكتى جايت. ويتكەنى، گرەكيانىڭ ءبىرىڭعاي ۆاليۋتالىق ايماقتان شىعۋى ولار ۇسىنىپ وتىرعان قايتا قۇرىلىمداۋدان دا مول پروبلەما اكەلەتىندىگى بەلگىلى.
«مۇسىلمان باۋىرلار» ۇيىمىنىڭ 183 جاقتاسى ءولىم جازاسىنا كەسىلدى
وسى دۇيسەنبىدە كايردىڭ قىلمىستىق سوتى ەلدە شەكتەۋ قويىلعان «مۇسىلمان باۋىرلار» ۇيىمىنىڭ 183 جاقتاسىنا كەسىلگەن ءولىم جازاسىن قۋاتتاعاندىعى بەلگىلى بولدى.
تەرگەۋ مالىمەتتەرىنە سايكەس، سوتتالۋشىلار 2013 - جىلدىڭ تامىزىندا ەل ارمياسىنىڭ پرەزيدەنت موحاممەد مۋرسيدى تاقتان تايدىرۋى كەزىندەگى شەرۋ بارىسىندا كاير ماڭىندا پوليتسيا قىزمەتكەرلەرىن ولتىرۋگە قاتىسقان. جاقسى قارۋلانعان ادامدار توبى كاير ماڭىنداعى كەردەس قالاشىعىنىڭ پوليتسيا ۋچاسكەسىن گراناتومەتپەن جانە اۆتوماتپەن اتقىلاپ، دەپارتامەنت باسشىسىن قوسا العاندا 13 قۇقىق قورعاۋ ورگانىنىڭ قىزمەتكەرىن ولتىرگەن بولاتىن.
ۇكىم مىسىر ءمۇفتياتى راتيفيكاتسيالاعاننان كەيىن جاريا ەتىلىپ وتىر. بۇل - سوتتىڭ 2014 -جىلدان بەرگى ءۇشىنشى جاپپاي ءولىم جازاسىنا كەسۋ ۇكىمى.
ەل بيلىگىنىڭ مۇنداي ۇكىمىنە قۇقىق قورعاۋ ۇيىمدارى نارازىلىق تانىتۋدا. ەۋرووداق تا بۇل شەشىمدى سىن تەزىنە الىپ، مىسىر بيلىگىن سوت ۇدەرىسىن حالىقارالىق ستاندارتتار تالابىنا ساي جۇرگىزۋگە شاقىردى.
ايتا كەتەرلىگى، موحاممەد ءمۋرسيدى 2013 - جىلدىڭ 3 - شىلدەسىندە فەلدمارشال ابدەل فاتاحح ءال- سيسي تاقتان تايدىرعان بولاتىن. قازىرگى ۋاقىتتا ەلدىڭ ەكس-پرەزيدەنتىنە ءولىم جازاسى كەسىلۋى مۇمكىن. وعان شەرۋشىلەردى ءولتىردى جانە تىڭشىلىقپەن اينالىستى دەگەن ايىپتار تاعىلۋدا.
تايۆاندا جولاۋشىلار ۇشاعى اپاتقا ۇشىرادى
سارسەنبى كۇنى عالامتورعا تايۆاندا اۆتوكولىكتەردىڭ بىرىندە ورناتىلعان ۆيدەوتىركەۋ قۇرىلعىسىنىڭ جازباسى جاريا ەتىلدى. وندا TransAsia Airways اۋەكومپانياسىنا تيەسىلى ATR-72 جولاشۋلار ۇشاعىنىڭ اپاتقا ۇشىراۋ ءساتى بەينەلەنگەن. ۇشاق وزەنگە قۇلاماستان بۇرىن ءبىر قىرىنان جانتايىپ، قاناتتارىنىڭ ءبىرى تايبەي قالاسىنىڭ اۆتوموبيل كوپىرىن ىلە كەتكەن. اۋە كەمەسىنىڭ ىشكى رەيستى ورىندايتىندىعى بەلگىلى.
تاراتىلعان اقپاراتتارعا قاراعاندا، ۇشاق اۋەگە كوتەرىلگەننەن كەيىن قوزعالتقىشى ىستەن شىعىپ، سونىڭ سالدارىنان وزەنگە قۇلاعان. قازىرگى ۋاقىتتا ىزدەۋ جۇمىستارىنىڭ ناتيجەسىندە 35 ادامنىڭ مۇردەسى تابىلدى. 15 ادام اپاتتان امان قالسا، 8 ى ءىز-ءتۇسسىز جوعالىپ وتىر. جالپى ۇشاق بورتىندا 53 جولاۋشى مەن 5 ەكيپاج مۇشەسى بولعان.
ماماندار قۇلاعان ۇشاقتىڭ 2 قارا جاشىگىن دە تاۋىپ، ونى تەكسەرۋگە كىرىسىپ تە كەتتى. اۋە كەمەسىنىڭ ەكى ۇشقىشى دا مەرت بولعان. تايبەي مەرى كو ۆەن-تسزە 42 جاستاعى ۇشقىش لياو لياو تسزيان-تسزۋندى باتىر دەپ وتىر. ونىڭ ايتۋىنشا، ۇشقىش اۋە كەمەسىن تۇرعىن ۇيلەر مەن كەڭسەلەرگە سوقتىرماي، الىپ وتە العان. ال ۇشاق تۇرعىن ۇيلەرگە سوعىلعاندا مەرت بولعاندار سانى مۇدان دا كوپ بولار ەدى.
اۆتور: مارلان جيەمباي