زايسان اۋدانىندا 182 كاسىپكەرگە اسىل تۇقىمدى مال ءوسىرۋ ءۇشىن سۋبسيديا بەرىلدى
زايسان اۋدانىندا بيىل ءبىرقاتار ماڭىزدى سالادا ءوسىم بايقالىپ وتىر.
ىسكە اسىرىلىپ جاتقان بارلىق جوبانىڭ باستى ماقساتى - حالىقتىڭ ءومىر ءسۇرۋ ساپاسىن جاقسارتۋ، ەلدى مەكەندەردىڭ ينفراقۇرىلىمىن دامىتۋ، جاڭا جۇمىس ورىندارىن قۇرۋ، ينۆەستيتسيا تارتۋ.
بۇل تۋرالى اۋدان اكىمى دۋلات قاجانوۆ «مەملەكەت باسشىسىنىڭ تاپسىرمالارى شەڭبەرىندە زايسان اۋدانىنىڭ الەۋمەتتىك- ەكونوميكالىق دامۋى» تاقىرىبىندا وتكەن باسپا ءسوز كونفەرەنسياسىندا ءمالىم ەتتى.
«ونەركاسىپ - اۋدان ەكونوميكاسىنداعى نەگىزگى سالالاردىڭ ءبىرى. جىل باسىنان بەرى وڭدەۋ ونەركاسىبىندە 890 ميلليون تەڭگەنىڭ ءونىمى شىعارىلدى. اتاپ ايتقاندا، 19,8 توننا كومىر، 14,2 توننا بەتون جانە قۇرىلىسقا قاجەتتى بەتون ونىمدەرى، 34 توننا وڭدەلگەن ءسۇت، 500 توننا ۇن، 418 توننا نان ونىمدەرى ءوندىرىلدى»، - دەيدى ول.
دۋلات قاجانوۆتىڭ ايتۋىنشا، اۋىل شارۋاشىلىعى سالاسى دا دامىپ جاتىر. بيىل وسى سالاعا 341 ميلليون تەڭگە كولەمىندە ينۆەستيتسيا تارتىلعان.
«اۋداندا مال سانى ارتىپ كەلەدى. ناقتى ايتقاندا، ءىرى قارا 98807، جىلقى 43725، قوي- ەشكى 105625 باسقا جەتتى. اسىل تۇقىمدى مال ءوسىرۋ جانە سانىن كوبەيتۋ ماقساتىندا مەملەكەتتەن سۋبسيديا الۋعا 209 كاسىپكەر قۇجاتتارىن تاپسىرعان بولاتىن. ونىڭ ىشىندە 182 ادامعا سۋبسيديا بەرىلدى»، - دەيدى اۋدان اكىمى.