بيىل كوكتەمدە 1815 كيىك لاعى ءتالىمباققا الىنادى
ورمان شارۋاشىلىعى جانە جانۋارلار الەمى كوميتەتىنىڭ باس ساراپشىسى اسقار ابدراحمانوۆتىڭ بريفينگ الدىندا ايتقان مالىمەتى بويىنشا، عىلىمي ماقساتقا كيىك الۋ كەزىندە ءبىر دە ءبىر جانۋار اتىلمايدى.
«كيىكتى عىلىمي ماقساتتا الىپ قويۋ تۋرالى ايتساق، اڭ اۋلاۋ وبەكتىلەرى بولىپ ەسەپتەلەتىن جانۋارلاردى الىپ قويۋ ليميتى بەكىتىلىپ جاتىر. سوندا عىلىمي- زەرتتەۋ ينستيتۋتتارىنىڭ، مەكەمەلەرىنىڭ وتىنىمدەرى بويىنشا بيىل 1815 باس كيىكتى الۋ كوزدەلىپ وتىر. كيىكتەر عىلىمي زەرتتەۋ ماقساتىمەن عانا الىنادى. جاڭگىر حان اتىنداعى اگروتەحنيكالىق ۋنيۆەرسيتەتىندە 2012 -جىلدان بەرى ءتالىمباق جۇمىس ىستەپ تۇر. سونىڭ بازاسىندا كيىكتەردى قولدان ءوسىرۋ جانە جارتىلاي ەركىندىكتە ۇستاۋ جۇمىستارىن جۇرگىزەدى»، - دەدى ول.
ساراپشىنىڭ ايتۋىنا قاراعنادا، كيىكتى اسىراۋداعى باستى ماقسات - ولارعا تىرىدەي زەرتتەۋ جۇمىستارىن جۇرگىزۋ.
«كوكتەمدە لاقتارىن الامىز. ودان كەيىن ءتالىمباقتا وسىرەدى. ءوسىرۋ كەزىندە زەرتتەۋ جۇمىستارى جۇرگىزىلەدى. جاس كەزىنەن باستاپ ازىق بەرۋ، تالدامالارىن الىپ وتىرۋ، جاي- كۇيىن تەكسەرۋ سول ماقساتتا الىنادى»، - دەدى اسقار ابدراحمانوۆ.
ورمان شارۋاشىلىعى جانە جانۋارلار الەمى كوميتەتى كيىتەردى ءتالىمباقتا ءوسىرىپ زەرتتەۋگە 750 ميلليون تەڭگە سۇراپ وتىر.
الداعى ءۇش جىلدا كيىكتەردىڭ پوپۋلياتسياسىن عىلىمي دەڭگەيدە زەرتتەۋ ءۇشىن ۋنيۆەرسيتەت بازاسىنداعى ءتالىمباقتا مىڭنان استام كيىك ءوسىرۋ جوسپارلانىپ وتىر. ورمان شارۋاشىلىعى جانە جانۋارلار الەمى كوميتەتىنىڭ باس ساراپشىسى اسقار ابدراحمانوۆ وسى ماسەلەگە ارنالعان بريفينگىدە اتالعان جوباعا قانشا قاراجات كەرەك ەكەنىن ايتتى.
«بىزدە عىلىمي- تەحنيكالىق باعىتتاعى قارجىلاندىرۋعا ءوتىنىم بەرىلگەن بولاتىن. سول ءوتىنىم ماقۇلداندى. ەندى بيۋدجەتتى ناقتىلاۋ كەزىندە، ناۋرىز ايىندا بۇل اقشالار قاراستىرىلادى. جىلىنا 250 ميلليون تەڭگە، سوندا ءۇش جىلعا 750 ميلليون تەڭگە ءبولۋ كوزدەلىپ وتىر»، - دەدى ساراپشى.