ناۋرىزدان باستاپ ءورت سوندىرۋشىلەر الاتىن ەڭ تومەنگى جالاقى 180 مىڭ تەڭگەگە دەيىن وسەدى
بۇل تۋرالى ق ر توتەنشە جاعدايلار ءمينيسترى يۋري يلين ءمالىم ەتتى، دەپ حابارلايدى قازاقپارات ءتىلشىسى.
«جالاقىعا قاتىستى قاۋلىنى تاياۋداعى رەسپۋبليكالىق بيۋجەت كوميسسياسىنىڭ قاراۋىنا ۇسىنامىز. ءورت سوندىرۋشىلەر قاڭتار، اقپاننىڭ ايلىعىن بۇرىنعى ەسەپپەن الادى دەپ ويلايمىن. ال ناۋرىزدىڭ ورتاسىندا رەسپۋبليكالىق بيۋجەتتەن اقشا تۇسكەن سوڭ قايتا ەسەپتەلۋى ءتيىس. تاياۋدا وتكەن مينيسترلىكتىڭ القا وتىرىسىندا دەپارتامەنتتەر جانە ءورت ءسوندىرۋ قىزمەتىنىڭ باسشىلارىنا جالاقى وسىمىنە قاتىستى ءمان-جاي تاعى ءبىر ءتۇسىندىرىلدى»، - دەدى يۋري يلين ۇكىمەتتىڭ كۋلۋارىندا تىلشىلەردىڭ ساۋالىنا جاۋاپ بەرە تۇرىپ.
ونىڭ ايتۋىنشا، جالاقىنىڭ ءوسۋى جۇمىسشىنىڭ ساناتىنا بايلانىستى.
تومەنگى جالاقى شامامەن 110 مىڭ تەڭگە بولسا، ەندى ولاردىڭ ايلىعى 180 مىڭ تەڭگەگە ارتادى دەپ كۇتىلىپ وتىر.
«مينيستر، ورىنباسارلارى مەن كوميتەت باسشىلارىنىڭ جالاقىسى وسپەيدى. ءورت ءسوندىرۋ قىزمەتتەرى مەن دەپارتامەنتتەردىڭ باسشىلىق قۇرامىنىڭ جالاقىسى دەيىن كوتەرىلەدى. ودان ارتىق بولمايدى. باستى نازار تومەنگى جالاقى الاتىن بۋىنعا بەرىلەدى»، - دەپ ءتۇسىندىردى مينيستر.
ەسكە سالساق، ءورت سوندىرۋشىلەردىڭ ايلىعىن ارتتىرۋ ماسەلەسى بىلتىر قوزعالعان ەدى.