ۆەدومستۆو ماجىلىسكە وسىنداي زاڭ جوباسىن ۇسىنباقشى، دەپ حابارلايدى قازاقپارات ءتىلشىسى.
بۇل تۋرالى ق ر ەنەرگەتيكا ءمينيسترى بولات اقشولاقوۆ ماجىلىستە ءوتىپ جاتقان ۇكىمەت ساعاتىندا ءمالىم ەتتى.
«2022 -جىلدىڭ قاڭتارىندا باسەكەلەستىكتى قورعاۋ جانە دامىتۋ اگەنتتىگى سۇيىتىلعان مۇناي گازىنىڭ باعاسىن رەتتەۋگە 180 كۇن بەلگىلەگەن بولاتىن. وسى 180 كۇن وتكەننەن كەيىن باعانىڭ كۇرت ءوسۋىن بولدىرماۋ ءۇشىن ەنەرگەتيكا مينيسترلىگى مەملەكەتتىك كىرستەر كوميتەتىمەن بىرگە ىشكى نارىقتا ساتىلاتىن سۇيىتىلعان مۇناي گازىنىڭ اينالىمىن باقىلاۋدى قولعا الادى»، - دەدى ول گاز سالاسىن دامىتۋ تۋرالى جاساعان بايانداماسىندا.
ايتۋىنشا، سۇيىتىلعان گاز باعاسىن رەتتەۋگە بەرىلگەن 180 كۇن بىتكەننەن كەيىن ەنەرگەتيكا مينيسترلىگىنە قوسىمشا قۇزىرەت بەرۋ قاجەت.
«سونىمەن بىرگە مينيسترلىك «گاز جانە گازبەن جابدىقتاۋ تۋرالى» زاڭعا تۇزەتۋلەر پاكەتىن ازىرلەدى. بۇل تۇزەتۋ بويىنشا ەنەرگەتيكا مينيسترلىگىنە سۇيىتىلعان گازدىڭ بولشەك ساۋداداعى شەكتى باعاسىن بەلگىلەۋ قۇزىرەتىن بەرۋ ماسەلەسى قاراستىرىلماق. ءتيىستى تۇزەتۋلەر ازىرلەنىپ بولعان سوڭ ق ر پارلامەنت ماجىلىسىنە جولدانادى»، - دەدى بولات اقشولاقوۆ.
ايتا كەتەيىك، 6- قاڭتاردا ق ر ۇكىمەتى ەلىمىزدىڭ بارلىق وڭىرىندە گازدىڭ شەكتى باعاسىن بەكىتكەن بولاتىن. شەكتى باعا 180 كۇنگە بەلگىلەنگەن ەدى.
اۆتور: مارلان جيەمباي