تۇركىستان وبلىسىنىڭ باس سانيتارلىق دارىگەرىنىڭ قاۋلىسىنا سايكەس، ازاماتتار كارانتين تالاپتارىن ساقتاپ، مەديتسينالىق ماسكا تاعىپ، الەۋمەتتىك ارالىقتى ساقتاۋى كەرەك. ءوڭىردىڭ ءموبيلدى توپتارى تۇراقتى تۇردە الدىن الۋ شارالارىن وتكىزىپ، كارانتين تالاپتارىنىڭ بۇزىلماۋىن قاداعالاۋدا. وسىنداي تەكسەرۋلەردىڭ بىرىندە تولە بي اۋدانىنىڭ پوليتسيا قىزمەتكەرلەرى كوكپار تارتۋ جاعدايىن انىقتاعان. تەكسەرۋ بارىسىندا جەرگىلىكتى تۇرعىننىڭ الاتاۋ اۋىلدىق وكرۋگىندە 100 گە تارتا ادامدى جيناپ، كوكپار ۇيىمداستىرعانى بەلگىلى بولدى.
ءموبيلدى توپتىڭ وكىلدەرى جينالعان ازاماتتارعا ءتۇسىندىرۋ جۇمىستارىن جۇرگىزگەن، كارانتين تالاپتارىنىڭ بۇزىلماۋى كەرەكتىگىن ەسكەرتىپ، بارلىعىن ۇيلەرىنە تارقاتقان. ءدال وسىنداي جاعداي قازىعۇرت اۋدانىندا دا تىركەلگەن ەكەن. ىزابۇلاق اۋىلىنىڭ تۇرعىنى جايىلىم جەردىڭ بىرىندە كوكپار ۇيىمداستىرعان. پوليتسيا قىزمەتكەرلەرى ول جەردە دە ءتۇسىندىرۋ جۇمىستارىن جۇرگىزدى. ال 80 ادامدى جيناعان ازامات جاۋاپكەرشىلىككە تارتىلدى. كوكپار ۇيىمداستىرعان تۇلعالار اكىمشىلىك كودەكستىڭ 425-بابى (حالىقتىڭ سانيتاريالىق- ەپيدەميولوگيالىق سالاماتتىلىعى سالاسىنداعى زاڭناما تالاپتارىن، سونداي- اق گيگيەنالىق نورماتيۆتەردى بۇزۋ) بويىنشا جاۋاپكەرشىلىككە تارتىلدى.