سەگىز ايدا كوشى-قون زاڭناماسىن بۇزۋدىڭ 180 مىڭ فاكتىسى انىقتالدى
بۇل تۋرالى بۇگىن پارلامەنت ماجىلىسىندە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەكسترەميزمگە جانە تەرروريزمگە قارسى ءىس- قيمىل ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى بويىنشا جۇمىس توبىنىڭ وتىرىسىندا ق ر ىشكى ىستەر ۆيتسە- ءمينيسترى راشيد جاقىپوۆ ءمالىم ەتتى.
ر. جاقىپوۆتىڭ سوزىنە قاراعاندا، ىشكى ىستەر مينيسترلىگى ازاماتتاردىڭ تىركەۋگە تۇرۋى باعىتىندا ءتيىستى شارالاردى جۇرگىزۋدى جوسپارلاپ وتىر. سونىمەن ءبىر مەزگىلدە، تىركەۋسىز تۇرۋعا قاتىستى مەرزىمدى ءبىر ايعا دەيىن قىسقارتۋ كوزدەلۋدە.
«ءبىز بارلىق تۇرعىنداردى تەكسەرۋدى قاراستىرىپ وتىرعانىمىز جوق، الايدا زاڭناما تالاپتارى ورىندالماعان جاعدايدا، وندا زاڭ بۇزۋشىلار جاۋاپكەرشىلىككە تارتىلادى»، - دەدى ول.
ونىڭ اتاپ وتۋىنشە، ۆەدومستۆو ۇسىنىپ وتىرعان شارالار باسپانا يەلەرىنىڭ جەكە ادامدارعا پاتەرلەرىن تىركەۋسىز ۇسىنعانى ءۇشىن جاۋاپكەرشىلىك جۇكتەيدى. پاتەر يەلەرى مەن باسقا دا تۇلعالاردىڭ تىركەۋسىز ازاماتتاردى تۇرعىزۋعا قاتىستى جاۋاپكەرشىلىگى ارتادى.
زاڭ جوباسى بويىنشا جۇمىس بارىسىندا دەپۋتاتتار تاراپىنان ءتۇرلى ماندەگى 120 تۇزەتۋ ەنگىزىلدى، سونىڭ ىشىندە جەكە تۇلعالاردى تىركەۋ ەرەجەسىن بۇزعانى ءۇشىن جاۋاپكەرشىلىككە قاتىستى باعىتى دا قامتىلعان.
اۆتور: رۋسلان عابباسوۆ