18 جاسار ستۋدەنتتىڭ تابىسى بولماسا دا بانكتەر كرەديت بەرەتىن، ەندى بەرمەيدى

استانا. KAZINFORM - ەلىمىزدە 500 مىڭعا جۋىق جاستىڭ تۇتىنۋشىلىق كرەديتى بار. بۇل تۋرالى قارجى نارىعىن رەتتەۋ جانە دامىتۋ اگەنتتىگىنىڭ ءتوراعاسى ءمادينا ءابىلقاسىموۆا ايتتى.

«قازىرگى ۋاقىتتا 18-20 جاس ارالىعىنداعى 480 مىڭ، شامامەن 500 مىڭ ادامنىڭ تۇتىنۋشىلىق كرەديتى بار. ونىڭ ىشىندە پروبلەمالىق كرەديتى بار ادامدار سانى - 47 مىڭ جاس»، - دەدى اگەنتتىك ءتوراعاسى ءماجىلىستىڭ جالپى وتىرىسىنان كەيىن ب ا ق وكىلدەرىنىڭ ساۋالىنا وراي.

ونىڭ اتاپ وتۋىنشە، بۇگىن ماجىلىستە 1-وقىلىمدا ماقۇلدانعان «كەيبىر زاڭنامالىق اكتىلەرگە كرەديت بەرۋ كەزىندە تاۋەكەلدەردى بارىنشا ازايتۋ جانە قارىز الۋشىلاردىڭ قۇقىقتارىن قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىندا جاستارعا تۇتىنۋشىلىق كرەديت بەرۋدى شەكتەۋ تەتىكتەرى قاراستىرىلعان.

«بۇرىن ولار رەسمي تۇردە تابىسى بولماسا دا كرەديت الا بەرەتىن. ەندى شاكىرتاقىسى نە جالاقىسى، ياعني رەسمي تابىسى بولسا عانا بەرىلەدى. جالپى، كرەديت الۋ - ادامنىڭ كونستيتۋتسيالىق قۇقىعى. دەگەنمەن، ونىڭ تابىسىنا بايلانىستى شەكتەۋ قويا الامىز»، - دەدى ءمادينا ءابىلقاسىموۆا.