قازاقستان تۇرعىندارىنىڭ سانى 18 ميلليون 212 مىڭ ادامدى قۇرادى
10:04, 15 - مامىر 2018
استانا. قازاقپارات - 2018 -جىلدىڭ ساۋىرىنەن بەرى قازاقستان رەسپۋبليكاسىندا حالىق سانى 18 ميلليون 212,2 مىڭ ادامدى قۇراپ، 2017 -جىلدىڭ سايكەس مەرزىمىمەن سالىستىرعاندا 237,7 مىڭ ادامعا كوبەيگەن.
بۇل تۋرالى قازاقپارات ق ر ۇلتتىق ەكونوميكا مينيسترلىگىنىڭ ستاتيستيكا كوميتەتىنە سىلتەمە جاساي وتىرىپ حابارلايدى.
اتاپ ايتقاندا، قازاقستاندا اتالعان مەرزىمدە قالا تۇرعىندارىنىڭ سانى 10 ميلليون 459,2 مىڭ ادامدى قۇرادى. بۇل ەل حالقىنىڭ جالپى سانىنىڭ 57,4 پروتسەنتى. ال اۋىل تۇرعىندارىنىڭ سانى 7 ميلليون 753,6 مىڭ ادامعا جەتكەن، بۇل حالىق سانىنىڭ 42,6 پروتسەنتى.
بيىلعى جىلدىڭ قاڭتار- ناۋرىزىندا 1 جاسقا دەيىنگى 820 بالانىڭ شەتىنەگەندىگى بەلگىلى بولدى (وتكەن جىلدىڭ سايكەس مەرزىمىندە -801). 2017 -جىلداعى جاعدايمەن سالىستىرعاندا 1 جاسقا دەيىنگى شەتىنەگەن بالالاردىڭ سانى 2,4 پروسەنتكە وسكەن. 2018 -جىلدىڭ العاشقى ءۇش ايىندا نارەستەلەردىڭ شەتىنەۋ كوەففيسيەنتى 100 بالاعا شاققاندا 8,85 جاعدايدى قۇراپ وتىر (8,67).