بۇل تۋرالى ق ر ەڭبەك جانە حالىقتى الەۋمەتتىك قورعاۋ ۆيتسە-ءمينيسترى ەربول وسپانوۆ ءمالىم ەتتى، دەپ حابارلايدى قازاقپارات ءتىلشىسى.
«بۇعان دەيىن بىزدە كەيبىر قىزمەتتەر تۇرعىلىقتى جەرى بويىنشا كورسەتىلىپ كەلدى. ياعني ازامات باسقا قالادا بولعان جاعدايدا الەۋمەتتىك كومەكتى الا المايدى. بۇل تۇرعىندار ءۇشىن قولايسىز. وسى ورايدا 17 الەۋمەتتىك قىزمەت ورتالىقتاندىرىلدى. ەندىگى ۋاقىتتا ەلىمىزدىڭ كەز كەلگەن وڭىرىنەن الەۋمەتتىك مەملەكەتتىك تولەمدەردى رەسىمدەپ الۋعا بولادى. اتالعان جاڭاشىلدىق ىسكە قوسىلعالى 75 مىڭ وتانداسىمىز ونى پايدالاندى»، - دەدى ەربول وسپانوۆ ەلوردادا وتكەن ادام جانە عالامشارعا ارنالعان سيفرلىق شەشىمدەر تاقىرىبىنداعى كونفەرەنتسيادا.
ۆيتسە-ءمينيستردىڭ ايتۋىنشا، كەيبىر الەۋمەتتىك قىزمەتتەردى بانك قوسىمشاسى ارقىلى الۋ مۇمكىندىگى بار.
«سوڭعى ۋاقىتتا ەلىمىزدە مەملەكەتتىك قىزمەتتەردى بانك قوسىمشالارى ارقىلى الۋ ترەندكە اينالدى. ءبىز دە كوشتەن قالماي، وتاندىق 3 بانكپەن كەلىسىمگە كەلىپ، 6 قىزمەتتى سولاردىڭ قوسىمشاسى ارقىلى ۇسىنىپ جاتىرمىز. بيىل 11 ايدا 280 مىڭ ادام اتالعان قىزمەت ءتۇرىن پايدالاندى. ازاماتتارعا ءوزى قولداناتىن بانك قوسىمشاسى ارقىلى باسقا دا قىزمەتتى الۋ ىڭعايلى بولىپ شىقتى»، - دەيدى ءمينيستردىڭ ورىنباسارى.
بۇعان دەيىن ەربول وسپانوۆ ەلىمىزدە ەڭبەك شارتى ونلاين جاسالىپ، جەكە ءىستىڭ سيفرلىق فورماتقا اۋىساتىنىن ايتقان ەدى.