ەلوردالىق جەكەمەنشىك بالاباقشالاردا جەتكىنشەكتەردى قورلاۋدىڭ 17 دەرەگى تىركەلدى
وقۋ جانە تاربيە پروتسەسىندە تاربيەلەنۋشىلەردىڭ دەنساۋلىعىنا جەڭىل زيان كەلتىرگەنى ءۇشىن جەكەمەنشىك مەكتەپكە دەيىنگى ۇيىمداردىڭ قىزمەتكەرلەرىنە قاتىستى 9 اكىمشىلىك ءىس قوزعالدى.
جانتۇرشىگەرلىك وقيعا ەلوردالىق «ساتي» بالاباقشاسىندا تىركەلدى. الەۋمەتتىك جەلىلەردە «ساتي» جەكەمەنشىك ينكليۋزيۆتى بالاباقشاسىنىڭ تاربيەشىلەرى بالانىڭ جىلاعانىنا نازار اۋدارماي، بۇلدىرشىندەردى بۇرىشقا تۇرعىزىپ، ولارعا فيزيكالىق كۇش قولدانىپ جاتقانى تۋرالى ۆيدەو تارادى.
تەكسەرۋ ناتيجەسى بويىنشا بالاباقشا مەڭگەرۋشىسىنە قاتىستى اكىمشىلىك قۇقىق بۇزۋشىلىق تۋرالى حاتتامالار تولتىرىلىپ، قىلمىستىق ءىس قوزعالدى.
سونداي-اق مەكتەپكە دەيىنگى مەكەمەنىڭ ءتيىستى حابارلاماسىز جۇمىس ىستەگەنى انىقتالدى.
نۇر-سۇلتانداعى «Majorik» بالاباقشاسى دا حابارلاماسىز جۇمىس ىستەگەن. ونىڭ باسشىلىعىنا قاتىستى اكىمشىلىك ءىس قوزعالدى. ەلورداداعى باسقا مەكتەپكە دەيىنگى ۇيىمداردا دا بالالارعا قاتىگەزدىكپەن قاراۋ فاكتىلەرى انىقتالدى.
«ەركەتاي» بالاباقشاسىندا تاربيەشىلەر بالانى اجەتحاناعا قاماپ تاستاعان، سونىڭ سالدارىنان بالا دەنە جاراقاتىن العان.
«Lily» ورتالىعىندا بالا باسقا بالانى ۇرىپ-سوققان، ءبىراق تاربيەشى جاعدايعا ەش كوڭىل اۋدارماعان.
«الان» بالاباقشاسىندا تاربيەشى بالانى ۇرىپ-سوققاندىقتان جۇمىستان شىعارىلدى.
«BOTAQAN-2020» ج ش س- دا اۋتيزم دياگنوزى بار ەگىزدەردىڭ دەنەسىنەن ءتىستىڭ ىزدەرى تابىلسا، «Baby Boom NurSultan» بالاباقشالارىندا بالالار قولدارىن كۇيدىرىپ العان.
وسىعان ۇقساس كەلەڭسىز وقيعالار باسقا بالاباقشالاردا دا انىقتالدى.
«قازىر بالاباقشا جۇمىسىن باستاپ، بالالاردى قابىلداۋى ءۇشىن كاسىپكەرلەردىڭ ۋاكىلەتتى ورگانعا حابارلاما جولداۋى جەتكىلىكتى. ولاردىڭ ودان كەيىنگى قىزمەتىن ەشبىر مەملەكەتتىك ورگان رەتتەمەيدى. سونىڭ سالدارىنان سوڭعى جىلدارى مەكتەپكە دەيىنگى ۇيىمداردا بالالاردىڭ قۇقىقتارىن بۇزۋ فاكتىلەرى كوبەيدى. ولاردىڭ كەيبىرەۋلەرىندە تاربيەشىلەر بالالارعا دۇرىس قارامايدى، سانيتارلىق جانە ءورت قاۋىپسىزدىگى تالاپتارى ساقتالمايدى، ونىمەن قوسا قىزمەتكەرلەردىڭ بىلىكتىلىگى دە كوڭىل كونشىتپەيدى. سول سەبەپتى وقۋ-اعارتۋ مينيسترلىگى بالاباقشالارعا ليتسەنزيا بەرۋ ءتارتىبىن قايتا ەنگىزۋگە باستاما جاساپ وتىر.
بۇل جەردە جەكەمەنشىك عانا ەمەس، سونىمەن قاتار مەملەكەتتىك بالاباقشالار دا ليتسەنزيا الادى.
مەنشىك نىسانىنا قاراماستان بالاباقشالار ەرەكشە تاۋەكەل ايماعىنا جاتادى.
بالالار ەرەكشە قورعاۋدى قاجەت ەتەدى، ولار جاسىنا بايلانىستى شاعىم جاساي المايدى جانە بۇزۋشىلىقتار تۋرالى دا ايتا المايدى.
سوندىقتان ليتسەنزيانى ەنگىزۋ مەكتەپكە دەيىنگى ۇيىمداردا بالالاردىڭ قاۋىپسىزدىگىن قامتاماسىز ەتۋ، بالالاردىڭ تولىققاندى ءوسۋى مەن دامۋى ءۇشىن قولايلى جاعدايلار جاساۋعا ەڭ تومەنگى تالاپتاردى بەلگىلەۋگە مۇمكىندىك بەرەدى. كوپتەگەن ادال كاسىپكەر مەن جەكەمەنشىك بالاباقشالار قاۋىمداستىعىنىڭ ءوزى بۇل باستامانى قولداپ، ليتسەنزيا بەرۋ مەكتەپكە دەيىنگى ۇيىمدار جۇمىسىنىڭ ساپاسىن ارتتىرۋ قۇرالدارىنىڭ ءبىرى ەكەنىن ءتۇسىنىپ وتىر»، - دەدى وقۋ-اعارتۋ مينيسترلىگى ءبىلىم جانە عىلىم سالاسىنداعى ساپانى قامتاماسىز ەتۋ كوميتەتى ءتوراعاسىنىڭ ورىنباسارى مايرا مەلدەبەكوۆا.