كولىك ۇرلاۋمەن اينالىسقان 17 قىلمىستىق توپ اشكەرەلەندى
بۇل تۋرالى ق ر ءى ءى م كريمينالدىق پوليتسيا دەپارتامەنتى باستىعىنىڭ ورىنباسارى قانات نۇرماعامبەتوۆ ءمالىم ەتتى، دەپ حابارلايدى قازاقپارات ءتىلشىسى.
«قابىلدانعان ءىس- شارالاردىڭ ناتيجەسىندە بيىل كولىك ۇرلىعىنىڭ 13,3، ال كولىكتى ايداپ كەتۋ قىلمىستارىنىڭ 17,8 پايىزعا تومەندەگەنى بايقالادى. جىل باسىنان بەرى اۆتوكولىك ۇرلانعانى ءۇشىن 749 ادام، ونىڭ ىشىندە 17 قىلمىستىق توپ ۇستالدى»، - دەدى قانات نۇرماعامبەتوۆ.
وسى رەتتە پوليتسيا شەنەۋنىگى كولىك يەلەرىنە قاراپايىم قاۋىپسىزدىك نورمالارىن ساقتاۋعا كەڭەس بەرەدى.
ياعني، كولىك ەسىگىن اشىق قالدىرماۋ، تۇندە كولىكتى گاراجعا نەمەسە كۇزەتىلەتىن اۆتوتۇراققا قويۋ، ۇرلىققا قارسى دابىل جۇيەسىن ورناتۋ، كولىك ىشىندە باعالى زاتتار مەن قۇجاتتار قالدىرماۋ، جەكە تۇلعادان اۆتوموبيل ساتىپ العان كەزدە قۇقىق بەلگىلەۋشى قۇجاتتارىن بەرۋدى تالاپ ەتۋ قاجەت.