ەستە قالار وقيعالار
1990 -جىلى الماتىدا قازاقستان كارىستەرىنىڭ قۇرىلتايى ءوتتى. وندا رەسپۋبليكالىق كارىس مادەنيەتى ورتالىقتارىنىڭ قاۋىمداستىعى قۇرىلدى.
1994 -جىلى قازاقستان رەسپۋبليكاسىنىڭ سىرتقى ىستەر مينيسترلىگى بۇرىنعى يۋگوسلاۆيا رەسپۋبليكاسى ماكەدونيانىڭ تاۋەلسىزدىگىن مويىنداۋ تۋرالى نوتا جىبەردى.
1995 -جىلى قازاقستان رەسپۋبليكاسى پرەزيدەنتى نۇرسۇلتان نازاربايەۆتىڭ جارلىعىمەن قازاقستان رەسپۋبليكاسىنىڭ ورتالىق سايلاۋ كوميسسياسى قۇرىلدى.
1995 -جىلى جۋرناليستيكا سالاسىنىڭ «التىن جۇلدىز» جالپى ۇلتتىق سىيلىعى تاعايىندالدى.
2001 -جىلدان باستاپ «التىن جۇلدىز» قازاقستان جۋرناليستيكا اكادەمياسىنىڭ رەسمي سىيلىعى. سىيلىق - شىعارماشىلىق تابىستاردى جانە قازاقستاندىق بۇقارالىق اقپارات قۇرالدارىنىڭ باسەكەگە تۇسە الاتىندىعىن كاسىبي جانە قوعامدىق تانۋدىڭ جوعارى بەلگىسى. قازىرگى تاڭدا قازاقستان جۋرناليستيكاسىنىڭ دامۋىنا ءوز ۇلەستەرىن قوسقان 100 دەن استام تۇلعا وسى سىيلىقپەن ماراپاتتالعان.
2000 -جىلى ەكونوميكالىق، ساياسي جانە مادەني سالالاردا اۋستريا مەن قازاقستاننىڭ اراسىنداعى دوستىق بايلانىستارىن نىعايتۋعا قوسقان سۇبەلى ۇلەسى ءۇشىن قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ «اۋستريا رەسپۋبليكاسىنىڭ الدىنداعى زور ەڭبەگى ءۇشىن ۇلكەن قۇرمەت جۇلدىزى» وردەنىمەن ماراپاتتالدى. اتالمىش قۇرمەت بەلگىسى — اۋستريانىڭ 1952 -جىلعى 2 -ساۋىردە بەكىتىلگەن مەملەكەتتىك ناگراداسى. ونى ۇلتتىق جينالىس قابىلداعان زاڭدارعا نەگىزدەلە اۋستريا فەدەرالدى پرەزيدەنتى تابىستايدى.
2005 -جىلى قازاقستان رەسپۋبليكاسى پرەزيدەنتىنىڭ جارلىعىمەن، ق ر ۇكىمەتىنىڭ قاۋلىسىمەن بەكىتىلگەن «2005-2007 -جىلدارعا ارنالعان قازاقستان رەسپۋبليكاسىندا عارىش قىزمەتىن دامىتۋ» مەملەكەتتىك باعدارلاماسىنا سايكەس «قازعارىش» ۇلتتىق كومپانياسى» ا ق قۇرىلدى.
2011 -جىلى ورتالىقازيالىق- قازاقستاندىق ۇساق شوقىلاردىڭ بىرەگەي ەكولوگيالىق جۇيەسىن ساقتاۋ ماقساتىندا «بۇيراتاۋ» مەملەكەتتىك ۇلتتىق تابيعي ساياباعى قۇرىلدى. ساياباق اقمولا وبلىسىنىڭ ەرەيمەنتاۋ اۋدانىنىڭ اۋماعىندا 60814 گەكتار جانە قاراعاندى وبلىسىنىڭ وساكاروۆ اۋدانىندا 28154 گەكتار جەردى الىپ جاتىر.
2012 -جىلى «مەرلەر بەيبىتشىلىك ءۇشىن» حالىقارالىق ۇيىمىنا كىرەتىن قازاقستاننىڭ ءۇش قالاسىنا (قاراعاندى، وسكەمەن جانە سەمەي) رەسپۋبليكانىڭ تاعى توعىز قالاسى قوسىلدى، ونىڭ ىشىندە شىعىس قازاقستاننىڭ سەگىز قالاسى بار. «مەرلەر بەيبىتشىلىك ءۇشىن» حالىقارالىق ۇيىمىنىڭ «بولاشاق-2020» كومپانياسى ديرەكتورلار كەڭەسىنىڭ ءتوراعاسى ليۋك دەانە قازاقستاندىق پاۆلودار، كۋرچاتوۆ، ريددەر، زىريان، شەمونايحا، زايسان، شار، اياگوز، سەرەبريانسك قالالارىنىڭ اكىمدەرىنە «مەرلەر بەيبىتشىلىك ءۇشىن» حالىقارالىق ۇيىمى مۇشەلەرىنىڭ سەرتيفيكاتتارىن تابىس ەتتى. شىعىس قازاقستان وبلىسىنىڭ اكىمدىكتەرى مەن «مەرلەر بەيبىتشىلىك ءۇشىن» حالىقارالىق حاتشىلىعى بىرلەسكەن ءىس- قيمىل جوسپارىنا قول قويدى.
2013 -جىلى سەمەي قالاسىنىڭ شەبەرلەرى تۇركىستاندا احمەت ءياساۋيدىڭ كەسەنەسىندە ورناتىلعان قولا تايقازاننىڭ كوشىرمەسىن جاسادى. ونىڭ ديامەترى - 2,45 م، سالماعى - 2 توننا.
2016 -جىلى الماتىدا «جانسايا ابدىمالىكتىڭ شاحمات اكادەمياسى» فيليالىنىڭ اشىلۋ سالتاناتى ءوتتى. فيليال 500 ادامعا شاقتالعان. بۇل فيليالدا 100 دەن استام كوپ بالالى جانە الەۋمەتتىك از قامتىلعان وتباسىلاردىڭ بالالارى تەگىن ءدارىس الاتىن بولادى.
2017 -جىلى استانادا «تۇمار» ۇلتتىق تەليەۆيزيالىق العاشقى سىيلىعىنىڭ جەڭىمپازدارىن ماراپاتتاۋ ءراسىمى ءوتتى. ۇيىمداستىرۋشىلار - «قازمەديا» ورتالىعى جانە قازاقستان رەسپۋبليكاسىنىڭ اقپارات جانە كوممۋنيكاتسيالار مينيسترلىگى. ماقساتى - ەڭ ساپالى جانە وزەكتى تەليەۆيزيالىق ءونىمدى انىقتاپ، تالانتتى كاسىپقويلاردى قولداۋ، سونداي- اق ساپالى قازاقستاندىق تەليەۆيزيانى دامىتۋ.
2018 -جىلى ەكونوميكالىق ىنتىماقتاستىق جانە دامۋ ۇيىمى كەڭەسى قازاقستاننىڭ بولات كوميتەتىنە كىرۋ تۋرالى ءوتىنىشىن ماقۇلدادى.
2019 -جىلى قازاقستاندىق اكتريسا سامال ەسلياموۆا گونكونگتا وتكەن ازيا كينواكادەمياسىندا (Asian Film Awards Academy) «ايكا» كارتيناسىنداعى باستى ءرولى ءۇشىن «ازيانىڭ ۇزدىك اكتريساسى» سىيلىعىنا يە بولدى.
2018 -جىلدىڭ مامىر ايىندا سامال ەسلياموۆا قازاقستاندىق كينەماتوگرافيا تاريحىندا تۇڭعىش رەت 71 كانن كينوفەستيۆالىندە ۇزدىك اكتريسا دەپ تانىلعان بولاتىن.