سۋ تاسقىنىنان بۇعان دەيىن قاۋىپسىز ايماققا 31 مىڭنان استام تۇرعىن ەۆاكۋاتسيالانعان بولاتىن. ال ەۆاكۋاتسيا ورىندارىنداعى 3500 گە جۋىق تۇرعىننىڭ بۇگىنگى جاي-كۇيى ءبىرقالىپتى.
ادامداردىڭ بارلىعى دەرلىك مەديتسينالىق تەكسەرىستەن وتكىزىلىپ، جاتىن ورىن مەن كورپە-توسەكپەن تەگىس قامتىلعان. سونداي-اق، تۇرعىندارعا كۇنىنە ءۇش مەزگىل تاماق بەرىلەدى.
ازىق-تۇلىك پەن جەكە باس گيگيەناسىن ساقتاۋعا قاجەتتى كەرەك-جاراقتىڭ ءبارى جەتكىزىلىپ جاتىر.
ال، وزگە دە قاجەتتى زاتتار مەن ازىق-تۇلىك تۇرلەرى ءاربىر ەۆاكۋاتسيا ورىندارىنا توتەنشە جاعدايعا بايلانىستى جاساقتالعان ورتالىق قويمادان ءتىزىم ارقىلى ۇلەستىرىلۋدە.
«ەۆاكۋاتسيا ورىندارى بوپ بەكىتىلگەن مەكتەپتەر مەن كوللەدج، مەشىتتەردە ورنالاسقان تۇرعىندار وسىنداي قيىن-قىستاۋ كەزەڭدە قول ۇشىن سوزىپ جاتقان مەملەكەت باسشىلىعىنا، ۇكىمەتكە، وبلىس، اۋدان باسشىلىقتارىنا جانە بارلىق قازاقستاندىقتارعا شىنايى العىستارىن جاۋدىرۋدا. ولار تاسقىن سۋدىڭ تەز بەتى قايتىپ، سۋ استىندا قالعان ءۇي-جاي مەن مال-مۇلىكتەرى جانە ەگىستىك القاپتارىنىڭ شىعىندارى وتەلەتىندىگىن دە ەستىپ قۋانۋدا. مۇنداي قيىندىقتا ەشكىمنىڭ نازاردان تىس قالمايتىنىنا بەك سەنىمدى»، دەلىنگەن اكىمدىكتىڭ حابارلاماسىندا.