ەلباسى 17 جىل بۇرىن تۇساۋىن كەسكەن بالا پرەزيدەنتكە ۋادەسىن بەردى
استانادا ەلباسى نۇرسۇلتان نازاربايەۆتىڭ قاتىسۋىمەن «نازاربايەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ 10 جىلدىعىنا ارنالعان «ۇلى دالا مۇراگەرلەرى» اتتى فورۋم ءوتىپ جاتىر.
«جاس ۇرپاققا ساپالى ءبىلىم مەن سانالى تاربيە بەرۋ ءۇشىن بارلىق جاعدايدى مەملەكەت جاساپ وتىر. ول ءار ۋاقىتتا مەنىڭ نازارىمدا. ەلىمىزدەگى زياتكەرلىك مەكتەپتەردىڭ بارلىق تۇلەكتەرىنەن كەلەشەكتە كوپ ءۇمىت كۇتەمىز. وسىندا العان بىلىمدەرىڭىز قازاقستاندى ودان ارى قاراي وركەندەتۋگە باعىتتالادى دەپ سەنەمىز. سەندەر ارقىلى ەلىمىزدىڭ بارلىق وقۋشىلارىنا مىنانى ايتقىم كەلەدى: قازىرگى ۋاقىتتا تەرەڭ ءبىلىم الۋ، شەت ءتىلىن ۇيرەنۋ، زاماناۋي تەحنولوگيانى مەڭگەرۋ - نەگىزى مىندەت بولۋعا ءتيىس. ەگەر دە ومىردە قويىلعان تالاپتارىڭا جەتەمىن دەسەڭدەر، وسىنى ءبىلۋ كەرەك. سوندا عانا كوزدەگەن ماقساتتارىڭا قول جەتكىزىپ، بيىك بەلەستەردى باعىندىرا الاسىزدار. وتانعا قىزمەت ەتەتىن بولىڭدار»، - دەدى مەملەكەت باسشىسى.
فورۋم بارىسىندا نازاربايەۆ ۋنيۆەرسيتىنىڭ ستۋدەنتى ابىلاي ساتىلحان وسىدان 17 جىل بۇرىن ەلباسىمەن بىرگە تۇسكەن فوتوسۋرەتىن پرەزيدەنتكە تابىستادى.
«بۇگىندە ساياساتتانۋ جانە حالىقارالىق قاتىناستار ماماندىعىندا ءبىلىم الۋدامىن. ءسىز تاۋەلسىز قازاقستاننىڭ بارشا پەرزەنتتەرىنىڭ ۇلكەن ومىردەگى تۇساۋىن كەسىپ، جاھاندىق دەڭگەيدە باسەكەگە قابىلەتتى ۇرپاق تاربيەلەدىڭىز. ءسىز «ۇلى دالانىڭ جەتى قىرى» ماقالاسىندا بابالارىمىزدىڭ ۇلى جەتىستىكتەرىن اتاپ ءوتتىڭىز. ەندى ءبىر ايدان كەيىن جاستار جىلى باستالادى. بىزگە بۇرىنعىدان دا زور مۇمكىندىكتەر اشىلادى. وسىنىڭ بارلىعى ءۇشىن سىزگە مىڭدا ءبىر راحمەت! وسىدان 17 جىل بۇرىن ەڭسەلى ەلوردامىز استانادا ءسىز تۇساۋىمدى كەسكەن ەدىڭىز. مەن بۇگىن ءبىزدىڭ اۋلەتتىڭ تۇمارى سەكىلدى ءاردايىم توردە ءىلىنىپ تۇراتىن مىنا سۋرەتتى وزىڭىزگە الا كەلدىم. ءسىز مەنى اۋەلەتە كوتەرىپ، «ازامات بول» دەپ باتا بەرىپسىز. مەن وسى موتيۆاتسيامەن ءومىر ءسۇرىپ، ءوزىڭىز ايتقانداي، مىقتى ازامات بولۋعا، ەلىم ءۇشىن قىزمەت ەتۋگە ۋادە بەرەمىن»، - دەدى ابىلاي ساتىلحان.