ديماش قۇدايبەرگەن: 17 ميلليون حالىق جەڭىسىمدى كۇتىپ وتىر
قىتاي تەلەارناسىنا بەرگەن سۇحباتى بارىسىندا ديماش قۇدايبەرگەن اتا-اناسى قازاقتىڭ سالت- ءداستۇرىن ۇستاناتىندىعىن اتاپ وتكەن. «ول كىسىلەر مۋزىكاعا دەگەن ىنتامدى، ماحابباتىمدى كورە الدى. انام اياعىنىڭ اۋىراتىنىنا قاراماستان 5 جاسىمنان مۋزىكا مەكتەبىنە الىپ باراتىن. اياعىندا ارتريتى بولسا دا ەكى ساعات كۇتىپ تۇراتىن. فورتەپيانوعا اپاردى، ودان كەيىن بالالار اراسىنداعى ءتۇرلى بايقاۋلارعا قاتىستىردى. ەڭ الدىمەن، اللا تاعالانىڭ بەرگەنى، ەكىنشىدەن، اتا-انامنىڭ ءانشى بولعانى مەن ءۇشى زور باقىت ەدى»، - دەدى ول.
سونداي-اق بەينەماتەريالدا ديماشتىڭ اناسى سۆەتلانا ايتبايەۆانىڭ دا شاعىن سۇحباتىنان ءۇزىندى بەرىلدى. «كىشكەنتاي كەزىنەن ەرىنبەي ىزدەنىپ، دايىندالا بەرەتىن. داۋىسىن سان قۇبىلتىپ ءتۇرلى جاتتىعۋلار جاسايتىن. سوعان سايكەس تابيعي داۋىس تا شىڭدالا تۇسەدى. ءاندى 4 وكتاۆاعا دەيىندە ەركىن ايتادى»، - دەدى ديماشتىڭ اناسى.
ديماش قىتايدان حابار كەلگەنگە دەيىن دە، حابار كەلگەننەن كەيىن دە جانە ءدال قازىرگى ۋاقىتتا ەسەڭگىرەگەن كۇيدە جۇرگەنىن ايتتى. «ءار ادام وزىنشە مىقتى، كەرەمەت، ادەمى. مەنىڭ ويىمداعىسى - ءانىمدى شىرقاۋ، قازاقشا ءان ايتىپ بەرۋ، كورەرمەننىڭ قوشەمەتىنە بولەنۋ. 17 ميلليون حالىق، ودان كەيىن الىس، جاقىن شەتەلدەگى تىڭدارماننىڭ ءبارى وسىنى كۇتىپ وتىر»، - دەدى ول.
سونداي-اق ديماشتىڭ اناسىمەن تەلەفون ارقىلى سويلەسكەن ءساتى كورسەتىلدى. «ماما بۇل جەڭىسىمدى پاپام ەكەۋىڭە ارنايمىن. ەندى قيىنداۋ بولۋى مۇمكىن، ءبىرىنشى اپتادا قوناق بولدىم. ەندى ۇنەمى قوناق بولىپ جۇرە بەرمەيسىڭ عوي. ەڭ باستىسى، ساحناعا شىعىپ، ءانىمدى ورىندادىم. ەگەر كورەرمەن قولدايتىن بولسا - 100 پايىزعا دايىنمىن»، - دەدى ول. ايتا كەتەيىك، ديماش قۇدايبەرگەن كەشە كەشقۇرىم وتكەن «Singer 2017» بايقاۋىنىڭ اتالمىش ەكىنشى كەزەڭىندە دە ءساتتى ونەر كورسەتىپ، كەزەكتى رەت باس جۇلدەگە يە بولدى. ول رەسەيلىك ورىنداۋشى ۆيتاستىڭ «وپەرا №2» ءانىن ورىندادى. بۇل جولى ديماشقا قولداۋ بىلدىرۋگە قازاقستاننان اكەسى باردى. ديماش جوبانىڭ ءبىرىنشى كەزەڭىندە فرانسۋزداردىڭ ەڭ قيىن كومپوزيتسيالارىنىڭ ءبىرى ايگىلى «SOS d'un terrien en détresse» ءانىن ورىنداعان بولاتىن.
اۆتور: مارلان جيەمباي