ءاز جانىبەك حاننىڭ 17- ۇرپاعى قازاقتىڭ العاشقى حانى كەرەي تۋرالى مالىمەتتەر از ەكەنىن ايتتى
وعان قوعام قايراتكەرلەرى، ءال-فارابي اتىنداعى قازاق ۇلتتىق ۋنيۆەرسيتەتى، ل. گۋميلەۆ اتىنداعى ەۋرازيالىق ۇلتتىق ۋنيۆەرسيتەتى، ش. ءۋاليحانوۆ اتىنداعى تاريح جانە ەتنولوگيا ينستيتۋتىنىڭ تاريحشى عالىمدارى، ستۋدەنتتەر جانە باسقا دا مۇددەلى تۇلعالار قاتىستى.
«بۇگىنگى شارانىڭ باستى ماقساتى - قازاقستان تاريحىندا قازاق حاندىعىنىڭ الار ورنىن ايقىنداۋ بولدى. سوندىقتان، بۇگىنگى عىلىمي جيىندا عالىمدار كەرەي مەن جانىبەك حاندار، ەسىم حان، قاسىم حان، تاۋكە حان، ءابىلقايىر حان، ابىلاي حان، كەنەسارى حان سەكىلدى ۇلى تۇلعالاردىڭ ءرولى، سونداي-اق قازاق باتىرلارىنىڭ، بيلەرى مەن جىراۋلارىنىڭ قازاق ەلىنىڭ قالىپتاسۋىنا قوسقان ۇلەستەرى جايلى جەكەلەن باياندامالار وقىدى»، - دەدى ءوز سوزىندە ءاز جانىبەك حاننىڭ 17- ۇرپاعى، «كەنەسارى حان» قوعامدىق قورىنىڭ ءتوراعاسى مۇحتارحان اباعان.
سونىمەن قاتار، ول قازاق حاندىعىنىڭ تاريحىندا اسىرەسە كەرەي حان تۋرالى ءالى كوپ عىلىمي زەرتتەۋلەر جۇرگىزىلۋى قاجەت ەكەندىگىن ايتتى.
«قازاق حاندىعىنىڭ تاريحىندا ءاز جانىبەك حان مەن ونىڭ ۇرپاقتارى كوبىرەك زەرتتەلىپ كەلدى. نەگە؟ ويتكەنى، ءاز جانىبەكتىڭ داۋىرىندە قازاق ۇلتىنىڭ ىرگەسى كەڭەيدى. ونىڭ ۇرپاقتارى قاسىم حان، حاقنازار حان وسى ءۇردىستى جالعاستىردى. سوندىقتان ولاردىڭ ءومىرى كوپ زەرتتەلدى. ال قازاقتىڭ العاشقى حانى كەرەي تۋرالى مالىمەتتەر از- اق. سوندىقتان وسى تاقىرىپتا الداعى ۋاقىتتا تىڭ تاريحي زەرتتەۋلەر جۇرگىزىلىپ، مونوگرافيالار جازىلىپ، كىتاپتار شىقسا نۇر ۇستىنە نۇر بولار ەدى»، - دەدى م. اباعان.
ايتا كەتەلىك، ۇيىمداستىرۋشىلاردىڭ ايتۋىنشا تاياۋ ۋاقىتتا موڭعوليا استاناسىندا قازاق حاندىعىنىڭ 550 جىلدىعىنا ارنالعان حالىقارالىق عىلىمي كونفەرەنسيا بولادى. ال بۇگىنگى شارانى دۇنيەجۇزىلك شىڭعىس حان اكادەمياسى ۇيىمداستىردى.
اۆتور: جاپپاربەرگەن ايبوتا