جامبىل جابايەۆ - 175: كيەۆتە پوەزيا وقۋلارى ءوتتى

كيەۆ. قازاقپارات - ۋكراينا استاناسى كيەۆتە قازاق اقىنى جامبىل جابايەۆتىڭ 175 جىلدىق مەرەيتويى قارساڭىندا پوەزيا وقۋلارى ءوتتى، دەپ حابارلايدى قازاقپارات.

بۇل جايىندا قازاقستاننىڭ ۋكرايناداعى ەلشىلىگى Facebook پاراقشاسىندا ءمالىم ەتتى.

قازاقتىڭ كورنەكتى سۋىرىپ سالما اقىنى جامبىل جابايەۆتىڭ تۋعان كۇنى قارساڭىندا كيەۆتەگى قازاق دياسپوراسى مەن قازاقستاننىڭ ۋكرايناداعى ەلشىلىگىمەن بىرگە جامبىل جابايەۆ اتىنداعى كوپشىلىك كىتاپحانا عيماراتىندا پوەزيا وقۋلارىن وتكىزدى.

ءىس-شاراعا قاتىسۋشىلار ج. جابايەۆتىڭ قازاق، ۋكراين جانە ورىس تىلدەرىندەگى ولەڭدەرىن - «تاراس»، «الاتاۋ»، « ۇلىما جاۋاپ» جانە تاعى باسقا شىعارمالارىن جاتقا وقىپ، ءومىربايانىن ايتىپ بەردى.

سونىمەن قاتار، قازاق تاعامدارىمەن شاي داستارحانىن ۇيىمداستىردى. جالپىعا ءمالىم، بيىل قازاقستان جامبىل جابايەۆتىڭ 175 جىلدىعىن اتاپ وتەدى. كيەۆ كوشەلەرىنىڭ ءبىرى ونىڭ قۇرمەتىنە اتالعان جانە «نيۆكي» ساياباعىندا ەسكەرتكىش ورناتىلعان.