اتىراۋدا ابايدىڭ 175 جىلدىق مەرەيتويىنا وراي بوكستان جارىس ءوتتى
سپورت شاراسى اتىراۋ وبلىسى اكىمدىگىنىڭ قولداۋىمەن جانە «SULEIMEN Promotions» پروۋموۋتەرلىك كومپانياسىنىڭ ۇيىمداستىرۋىمەن ءوتتى.
5 جەكپە-جەكتەن تۇراتىن كاسىپقوي بوكس كەشى سانيتارلىق نورمالارعا ساي كورەرمەنسىز ءوتىپ، جۇرتشىلىققا «حابار» تەلەارناسى ارقىلى تىكەلەي ەفيردە كورسەتىلدى. دودادا قازاقستاندىق 22 جاسار بەكزات نۇرداۋلەتوۆتىڭ قارسىلاسى تانزانيالىق 28 جاستاعى يبراحيم ماوكالا بولدى. التى راۋندقا جوسپارلانعان جەكپە-جەك ەكىنشى راۋندتا نوكاۋتپەن اياقتالدى.
وسىلايشا قازاقستاندىق بوكسشى بەكزات نۇرداۋلەتوۆ كاسىپقوي بوكستاعى دەبيۋتىن ءساتتى باستادى.
ال دانيلا سەمەنوۆ تانزانيالىق قارسىلاسى مۋسسا ادجيبۋدى ءتورتىنشى راۋندتا تەحنيكالىق نوكاۋتقا جىبەردى. بۇل اۋىر سالماقتاعى جەكپە-جەك التى راۋندقا جوسپارلانعان. كەشتىڭ ءۇشىنشى جەكپە-جەگى قازاقستاندىق ەۆگەني پاۆلوۆ پەن تانزانيادان كەلگەن تاجىريبەلى گۋدلاك مرەمانىڭ اراسىندا ءوتتى.
ەكىنشى جەڭىل سالماقتاعى بۇل جەكپە-جەك ەكىنشى راۋندتا اياقتالدى. ەۆگەني پاۆلوۆ قارسىلاسىن نوكاۋتقا ءتۇسىرىپ، جەڭىسكە جەتتى.
ابىلايحان ءجۇسىپوۆ كاسىپقوي بوكستاعى العاشقى جەكپە-جەگىن تانزانيالىق مەشاك مۆانكەمۆامەن وتكىزدى. ءبىرىنشى ورتا سالماقتاعى ايقاس التى راۋندقا سوزىلىپ، تورەشىلەر شەشىمىمەن جەكپە- جەك ءجۇسىپوۆتىڭ جەڭىسىمەن اياقتالدى.
باستى ايقاس قازاقستاندىق بوكسشى بەك نۇرماعانبەت پەن تانزانيالىق ابدالاح پازيمەن اراسىندا ۇيىمداستىرىلدى. جارتىلاي اۋىر سالماقتاعى جەكپە-جەك التى راۋندقا سوزىلىپ، شەشىم بويىنشا نۇرماعانبەتتىڭ جەڭىسىمەن اياقتالدى.
ايتا كەتەيىك، اتالعان سپورتتىق دودادا قازاقستاندىق ءۇش بىردەي سپورتشى كاسىپقوي بوكستاعى العاشقى جەكپە-جەگىن وتكىزدى. ولار - دانيلا سەمەنوۆ، ابىلايحان ءجۇسىپوۆ، بەكزات نۇرداۋلەتوۆ.