اباي-175: سەمەيلىك دومبىراشى بالالار رەسپۋبليكالىق بايقاۋدا توپ جاردى

سەمەي. قازاقپارات - سەمەيلىك وقۋشىلار «ۇلى دالانىڭ ۇلى ابايى» اتتى رەسپۋبليكالىق بالالار ونەر بايقاۋىندا كۇي ورىنداپ، ءبىرىنشى ورىندى يەلەندى، دەپ حابارلايدى قازاقپارات.

حاكىمنىڭ 175 جىلدىعى اياسىندا ۇيىمداستىرىلعان سايىس سەمەي قالالىق مادەنيەت ۇيىندە وتكەن.

بايقاۋعا تىڭعىلىقتى دايىندىقپەن كەلگەن جەرگىلىكتى فيزيكا- ماتەماتيكا باعىتىنداعى نازاربايەۆ زياتكەرلىك مەكتەبىنىڭ 7-سىنىپ وقۋشىلارى ۇلان تالعاتوۆ پەن دارحان ورالحانوۆ «اسپاپتا ويناۋ» اتالىمىندا داۋلەتكەرەيدىڭ «كوروعلى» كۇيىن ورىنداپ، جەڭىسكە جەتتى.

«ءداستۇرلى بايقاۋ بالالاردىڭ جاس ەرەكشەلىگىن ەسكەرە وتىرىپ 7 جانر بويىنشا وتكىزىلدى. ۇلان مەن دارحان مەكتەبىمىزدەگى تالانتتى شاكىرتتەردىڭ قاتارىنان. ءبىر اتاپ وتەرلىگى - ولاردىڭ ەكەۋى دە دومبىرادا ويناۋدى بىلمەيتىن. از عانا ۋاقىت ىشىندە بىرنەشە كۇي ۇيرەنىپ، ءتىپتى بايقاۋلارعا قاتىساتىن دارەجەگە جەتتى. وسىنىڭ بارلىعى - نازاربايەۆ زياتكەرلىك مەكتەپتەرىندەگى جەلىلىك «100 كۇي» جوباسىنىڭ جەمىسى»، - دەيدى دومبىرا ۇيىرمەسىنىڭ مۇعالىمى ماديار اشيروۆ.

اۆتور: تالعاتجان مۇحامەتبەك ۇلى