ابايدىڭ 175 جىلدىعى: اقىن- جازۋشىلار مەرەيتويعا ءبىر كىسىدەي اتسالىسادى - ۇلىقبەك ەسداۋلەت
«ابايدىڭ 175 جىلدىعىن مەرەكەلەۋ جازۋشىلار وداعىنىڭ، قالامگەرلەردىڭ كۇتىپ جۇرگەن قاۋلىسى بولاتىن. مۇنىڭ جاي قاۋلى ەمەس، پرەزيدەنت جارلىعى بولىپ شىققانىندا ۇلكەن ءمان بار. قاسىم- جومارت توقايەۆتىڭ ۇلتىمىزدىڭ ۇلى اقىنىن ۇلاعاتتاۋدا ەرەكشە جاناشىرلىعى، تىلگە، ادەبيەتكە دەگەن جاناشىرلىعى، اباي قۇنانبايەۆتىڭ شىعارماشىلىعىنا دەگەن ۇلى قۇرمەتى دەپ ءبىلۋ كەرەك. بۇل جارلىقتا عىلىمي- پراكتيكالىق كونفەرەنسيالار، ابايدىڭ شىعارماشىلىعىنا قاتىستى الەم جۇرتشىلىعىنىڭ قىزىعۋشىلىعىن ارتتىرۋ، الەمگە ابايدىڭ قادىر- قاسيەتىن، جۇمباعىن ءتۇسىندىرۋ سياقتى ۇلكەن ماقسات تۇر. ونىڭ ار جاعىندا بۇرىن كەتكەن ولقىلىق- كەمشىلىكتەردى ەسكەرە وتىرىپ، اباي شىعارمالارىن الەمنىڭ جەتەكشى تىلدەرىنە اۋدارۋعا كوڭىل بولىنۋدە»، - دەدى ۇلىقبەك ەسداۋلەت.
جازۋشىلار وداعى باسشىسىنىڭ سوزىنشە، بۇل مەرەيتويعا قازاقستان اقىن- جازۋشىلارى دا ءبىر كىسىدەي اتسالىسپاق.
«ارينە، ءبىزدىڭ بۇكىل جازۋشىلاردىڭ، اقىنداردىڭ اتاسى - اباي. ءبىزدىڭ جازۋشىلار اباي شىعارمالارىن جاس ۇرپاق بويىنا انا سۇتىمەن سىڭىرۋگە، قادىر- قاسيەتىن تۇسىندىرۋگە ءبىر كىسىدەي ات سالىسادى. اباي وقۋلارىن وتكىزۋ، زەرتتەۋ ماقالالارىن جازۋ، ونىڭ ءجۇرىپ وتكەن جەرلەرىمەن ساپارلاۋ، اقىنعا بايلانىستى شىعارمالاردى ساحنالاۋ، تولىققاندى دۇرىس فيلم ءتۇسىرۋ جانە تاعى باسقا جۇمىستار اتقارىلىپ جاتىر. جاڭادان پوەتيكالىق قويىلىمداردى ىسكە اسىرۋ، بۇكىل بالاباقشادان باستاپ مەكتەپتەردە اباي ولەڭدەرىن جاتتاتۋ، ونىڭ قارا سوزدەرىنىڭ ءمانىن اشىپ بەرۋ، باسقا دا كوپ ءىس شارالار جوسپارلانىپ وتىر. كەلەسى جىل تۇركسوي بويىنشا نەمەسە قازاقستان كولەمىندە اباي جىلى بولىپ جاريالاناتىنى انىق»، - دەدى ۇ. ەسداۋلەت.
ايتا كەتۋ كەرەك، 30 - مامىر كۇنى ق ر پرەزيدەنتى قاسىم- جومارت توقايەۆ 2020 -جىلى ابايدىڭ 175 جىلدىق مەرەيتويىن مەرەكەلەۋ تۋرالى جارلىققا قول قويدى.
اۆتور: گۇلميرا عوسمانالي