وتكەن اپتادا د د ۇ ەۋروپانى ۆيرۋستىڭ «وشاعى» دەپ جاريالاپ، ەل ۇكىمەتتەرىن COVID-19 -دىڭ تارالۋىن باقىلاۋ ءۇشىن كوبىرەك شارا قابىلداۋعا شاقىرعان ەدى. گەرمانيادا كانتسلەر انگەلا مەركەل ءدىني عۇرىپتاردى وتكىزۋگە تىيىم سالىپ، ازاماتتاردان ىشكى نەمەسە شەتەلدىك ساپارلارعا شىقپاۋىن سۇرادى. كلۋبتار، بارلار، ويىن- ساۋىق ورىندارى، حايۋاناتتار باعى جانە ويىن الاڭدارى جابىلادى. مەيرامحانالار جۇمىس ۋاقىتىن شەكتەۋ ءۇشىن كەستەلەر اراسىنداعى قاشىقتىقتى ساقتاۋى ءتيىس. ەلدەگى مەكتەپتەردىڭ ءبارى قازىردىڭ وزىندە جابىق تۇر.
قازىرگى ۋاقىتتا گەرمانيادا كوروناۆيرۋس ينفەكسياسىنىڭ 7 مىڭ راستالعان جاعدايى بار. ۆيرۋس 14 ادامنىڭ ءومىرىن قيعان. حالىقتىڭ ءبىر جەرگە جينالۋىنا رەسمي تىيىم سالىنعان. ال يسپانيا قازىرگى ۋاقىتتا كوروناۆيرۋستان زارداپ شەككەن مەملەكەتتەردىڭ ىشىندە ءتورتىنشى ورىندا تۇر. سەيسەنبى كۇنى ونداعى ەل بيلىگى كوروناۆيرۋستان قايتىس بولعانداردىڭ سانى 342-دەن 491-گە وسكەنىن مالىمدەدى. راستالعان جاعدايلار 9942-دەن 11178-گە دەيىن ارتتى. سەنبىدە ەلدە كارانتين ءىشىنارا ەنگىزىلدى.
ۆيرۋس شىققان قىتايدان تىسقارى ەڭ كوپ زارداپ شەككەن ەلدەردىڭ باسىندا يتاليا تۇر. دۇيسەنبىدە ول ەلدىڭ بيلىگى ءولىم- ءجىتىمنىڭ وسكەنىن حابارلادى. قايتىس بولعانداردىڭ سانى 2 مىڭ ادامنان استى. بەلگيادا كوروناۆيرۋستى جۇقتىرعاندار سانى سەيسەنبىدە بەستەن 10-عا دەيىن، ياعني ەكى ەسە ارتتى. سارسەنبىدە شۆەتسيا بارلىق جوعارى وقۋ ورنى مەن مەكتەپتەردى جابادى. بۇگىنگى تاڭدا فرانسيادا 6 مىڭنان استام جاعداي جانە 148 ءولىم تۋرالى حابارلانعان.
ەۋروپادان تىس احۋال قانداي
سەيسەنبىدە ا ق ش- تىڭ دەموكراتيالىق سايلاۋ بويىنشا وگايو شتاتىندا، كەيىن اريزونا، فلوريدا جانە يللينويس شتاتتارىندا ءوتۋى ءتيىس داۋىس بەرۋ كەيىنگە قالدىرىلدى. پرەزيدەنت دونالد ترامپ كوروناۆيرۋسقا بايلانىستى توتەنشە جاعداي جازدىڭ سوڭىنا دەيىن نەمەسە ودان دا ۇزاققا سوزىلۋى مۇمكىن ەكەنىن، ال امەريكالىقتار الداعى 15 كۇندە 10-نان استام ادامنان تۇراتىن توپقا جينالماۋى كەرەكتىگىن، سونداي- اق بارلارعا، مەيرامحانالارعا، تاماقتانۋ الاڭدارىنا جانە سپورت زالدارىنا بارۋدان اۋلاق بولۋ كەرەكتىگىن مالىمدەدى.
سەيسەنبى كۇنى قىتاي وزگە ەلدەردەن كەلگەن 20 ادامنان ينفەكسيا انىقتالعانىن حابارلادى. ال فيليپپين ءوز بيرجاسىن بەلگىسىز مەرزىمگە جاپقان العاشقى ەل بولدى.
كوروناۆيرۋستان ەڭ كوپ زارداپ شەككەن ءۇشىنشى ەل - يران. مۇندا سوت وكىلى ۆيرۋستىڭ تارالۋىنا بايلانىستى 85 مىڭعا جۋىق تۇتقىننىڭ، ونىڭ ىشىندە ساياسي تۇتقىندار ۋاقىتشا بوساتىلعانىن ءمالىم ەتتى. مالايزيا سارسەنبىدەن باستاپ سينگاپۋرمەن شەكارادان وتۋگە تىيىم سالادى. ءۇندىستانداعى تادج ماحال ەسكەرتكىش- كەشەنى جابىلدى. اۆستراليالىق عالىمدار اعزانىڭ يممۋندىق جۇيەسى COVID-19 ۆيرۋسىمەن قالاي كۇرەسەتىندىگىن انىقتاعانىن مالىمدەدى. د د ۇ باسشىسى تەدروس ادحانوم گەبرەيەسۋس باسقا ەلدەرگە ۆيرۋسپەن كۇرەستە قىتاي مەن وڭتۇستىك كورەيادان ۇلگى الۋعا كەڭەس بەردى.
اۆتور: ايان بەكەن ۇلى