جەرگىلىكتى پوليتسيا قىزمەتىنەن ءمالىم ەتكەندەي، سەنبى كۇنى تاڭعى 6-دان جەكسەنبى كۇنى تاڭعى 10-عا دەيىنگى ارالىقتا 171 جول اپاتى تىركەلگەن. ولاردىڭ سالدارىنان 13 ادام زارداپ شەككەن.
«كالگاريدە قار جاۋعان سوڭ وسىنداي اپاتتار ءجيى بولادى»، - دەيدى پوليتسەيلەر.
اپاتتىڭ ەڭ ءىرىسى Beddington Trail جانە Deerfoot Trail كۇرە جولدارىنىڭ قيىلىسىندا بولعان. وندا 16 كولىك ءبىر- بىرىنە سوقتىعىسقان.
Environment Canada-نىڭ دەرەگىنە سۇيەنسەك، قالاداعى جاۋىن- شاشىننىڭ جالپى مولشەرى 15-25 سانتيمەترگە جەتۋى مۇمكىن.
وكوتوكس، حاي ريۆەر، كلەرسحولم، كراۋنسنەست پاسس، پينچەر كريك، ۋوتەرتون، كاناناسكيس جانە كەنمور اۋداندارىنىڭ تۇرعىندارىنا اۋا رايىنا بايلانىستى ەسكەرتۋلەر جىبەرىلگەن.
البەرتا پروۆينتسياسىنىڭ وڭتۇستىك- باتىس بولىگىن دە قار باسقان. دۇيسەنبى كۇنى مۇندا قاردىڭ قالىڭدىعى 1 مەترگە دەيىن جەتۋى ىقتيمال.
اتالعان اۋداندارعا بارماقشى بولعان تۇرعىندارعا ساپارلارىن كەيىنگە قالدىرۋعا كەڭەس بەرىلۋدە.
كالگاري حالىقارالىق اۋەجايى جەكسەنبى كۇنگى رەيستەردىڭ دەنىن توقتاتتى. دۇيسەنبىدە كالگاريدىڭ وڭتۇستىگىندە ورنالاسقان مەكتەپتەردە، لەتبريدج ۋنيۆەرسيتەتىندە، Kainai Board of Education مەكتەبىندە ساباق بولمايتىنى جاريالاندى.