ورتالىق ازيا ەلدەرى 170 ميلليارد دوللار ينۆەستيتسيا تارتا الادى –س ءى م
سىرتقى ىستەر ءمينيسترىنىڭ ورىنباسارى ەرمۇحامبەت قونىسپايەۆ «ورتالىق ازيا-2030: بولاشاقتىڭ كەلبەتى» اتتى ساراپشىلار كەزدەسۋىندە وسىنداي پىكىر ءبىلدىردى، دەپ حابارلايدى قازاقپارات ءتىلشىسى.
«سونىمەن بىرگە ورتالىق ازيا ينۆەستيتسيا سالۋعا ەڭ الەۋەتتى وڭىرلەردىڭ ءبىرى رەتىندە مويىندالىپ وتىر. حالىقارالىق باعالاۋلارعا سۇيەنسەك، الداعى 10 جىلدىڭ ىشىندە ءوڭىردىڭ تىكەلەي شەتەلدىك ينۆەستيتسيا تارتۋ مۇمكىندىگى 170 ميلليارد دوللارعا دەيىن جەتۋى مۇمكىن. ونىڭ ىشىندە ەكونوميكانىڭ شيكىزاتتىق ەمەس سالاسىنا 80 ميلليارد دوللارعا دەيىن ينۆەستيتسيا تارتۋعا بولاتىنى ايتىلىپ ءجۇر. ءبىزدىڭ باعالاۋىمىزشا، مۇنىڭ ءبارى ەلدەرىمىزدىڭ بەسجاقتى ءوزارا بايلانىسىن دامىتۋدىڭ ماڭىزى جوعارى ەكەنىن كورسەتەدى»، - دەدى ءمينيستردىڭ ورىنباسارى.
ۆيتسە-مينيستر بىلتىر الەمنىڭ جەتەكشى ەلدەرى «ورتالىق ازيا+» فورماتىنداعى كەزدەسۋلەر وتكىزۋگە ەرەكشە قىزىعۋشىلىق تانىتقانىن اتاپ ءوتتى.
«وتكەن جىلدىڭ ءون بويىندا الەمدەگى جەتەكشى ەلدەردىڭ «ورتالىق ازيا+» فورماتىندا ءوزارا ءتيىمدى ارىپتەستىك پەن بايلانىس ورناتۋعا دەگەن قىزىعۋشىلىعى كۇرت وسكەنىن كوردىك. بىلتىر جاپونيا، وڭتۇستىك كورەيا، گەرمانيا، ا ق ش، ءۇندىستان، قىتاي، رەسەي، مەملەكەتتەرىنە ەۋروپالىق وداقتىڭ، پارسى شىعاناعىنداعى اراب ەلدەرىنىڭ قاتىسۋىمەن بىرنەشە اۋقىمدى شارالار ءوتتى. بۇل شارالار تۇتاس ءوڭىردىڭ بەيبىتشىلىك پەن تۇراقتىلىقتى، ازىق-تۇلىك قاۋىپسىزدىگىن تاتۋ كورشىلىك پەن ءوزارا قولداۋ رۋحىندا قامتاماسىز ەتۋدەگى اۋعانستان ماسەلەسىن رەتتەۋدەگى جانە ەۋروپا مەن ازيا اراسىنداعى بالاما كولىك دالىزدەرىن قالىپتاستىرۋداعى، ەسىرتكى اينالىمىنا رەيدتەر جۇرگىزۋدەگى ماڭىزى ارتىپ كەلە جاتقانىن كورسەتتى»، - دەدى ەرمۇحامبەت قونىسپايەۆ.