بۇل ءتالىمباقتىڭ جۇمىس ىستەپ كەلە جاتقانىنا دا جارتى عاسىرعا جۋىق ۋاقىت بولدى. جالپى كولەمى 349,5 گەكتار اۋماقتى الىپ جاتىر. بۇگىندە ءبىزدىڭ ءتالىمباقتا 39 ءتۇرلى اعاش-بۇتا تۇقىمى وسىرىلەدى، دەدى «استانا- كوگالداندىرۋ قۇرىلىسى» ا ق-تىڭ باسقارما ءتوراعاسى جارقىن جۇماعۇلوۆ «ەگەمەن قازاقستان» گازەتىنە بەرگەن سۇحباتىندا.
سولاردىڭ ىشىندە بۇرىن بۇل ايماقتا مۇلدە تامىر جايماعان 16 اعاش-بۇتا جانە گۇل تۇقىمى جەرگىلىكتى جاعدايعا جەرسىندىرۋ ارقىلى ءقازىر قالامىزدا وندىرىستىك اۋقىمدا وسىرىلە باستادى.
ولاردىڭ قاتارىندا ۇساق جاپىراقتى جوكە، ۇشكىر جاپىراقتى ۇيەڭكى، دولانا، بوللە تەرەگى سياقتى اعاشتاردى، قىزىل بۇرگەن، اقشاتىر، راۋشان سياقتى گۇلدەردى اتاۋعا بولادى. جالپى العاندا، ءتالىمباقتا 580 مىڭ اعاش كوشەتتەرى، ونىڭ ىشىندە 250 مىڭ دانا جاپىراقتى اعاشتار، 258 مىڭ دانا بۇتالار، 72 مىڭ قىلقان جاپىراقتى اعاشتار وسىرىلەدى.
«جىل سايىن ءتالىمباق قالا كوشەلەرىندە ءوسىرۋ ءۇشىن 50 مىڭ ءتۇپ اعاش كوشەتتەرىن بەرەدى. ەلوردا ورنالاسقان ايماقتىڭ كۇردەلى توپىراقتىق- كليماتتىق احۋالىن ەسكەرە كەلىپ، ءبىز اعاش ەگۋدە مۇلدە جاڭا اگروتەحنيكالىق تاسىلدەردى قولدانامىز. سوڭعى 10 جىل ىشىندە قالامىزدا 1 ميلليون تۇپتەن استام اعاش كوشەتتەرى مەن بۇتالارى وتىرعىزىلدى. وندىرىستىك جوسپارىمىزعا سايكەس ۇستىمىزدەگى جىلى اۋداندىق اكىمدىكتەرمەن بىرلەسە وتىرىپ، 5086 دانا ءىرى ولشەمدەگى اعاش كوشەتتەرىن وتىرعىزۋدى جوسپارلادىق. قازىرگى كەزدە اكىمدىكتەر اۋماعىندا اعاش جانە بۇتا تۇپتەرىن ەگۋ جالعاسۋدا»، - دەيدى جارقىن جۇماعۇلوۆ.
ونىڭ ايتۋىنشا، سوڭعى ۋاقىتتا قالانى سان ءتۇرلى گۇلدەرمەن كومكەرۋدى داستۇرگە اينالدىرىپ كەلەدى. گۇلزارلاردىڭ اۋماعى جىل سايىن كەڭەيتىلىپ وتىرادى. بيىلعى جىلى ول 170 مىڭ شارشى مەتر اۋماقتى قامتىماق. وسىنداي كولەمگە 9 ميلليون ءتۇپ گۇل ەگىلدى.
«سوڭعى 10 جىل ىشىندە قالامىزداعى گۇلستان كولەمى 3 ەسە ءوسىرىلدى. گۇل ەگىلەتىن گۇلزارلاردىڭ جوباسىن تيىسىنشە ءبىزدىڭ لاندشافتىق- جوبالاۋ شەبەرحاناسى جاسايدى. سونىمەن بىرگە، كەيىنگى كەزدە ءبىزدىڭ كاسىپورىن وسىمدىكتەردى كۇزەپ رەتتەۋ ارقىلى جاسىل مۇسىندەر جاساۋ ءداستۇرىن تاجىريبەگە ەنگىزىپ كەلەدى. قازىر قالامىزدا وسىنداي 19 جاسىل ءمۇسىن كوز تارتادى. بۇل مۇسىندەردى كەز كەلگەن جاسىل وسكەندەردەن جاساي بەرۋگە بولمايدى. ول ءۇشىن 1 شارشى مەتر ارنايى اۋماققا 2 مىڭ ءتۇپ وسىمدىك وسىرىلەدى. بيىلعى جىلى قالا بويىنشا كوشەلەردى قورشاعان تەمىر شارباقتارعا گۇل وسىرىلگەن 3786 اسپالى قىش قۇمىرالار ىلىنەتىن بولادى. اتاپ ايتقاندا، الماتى اۋدانىندا - 641، ەسىل اۋدانىندا - 2588، سارى ارقا اۋدانىندا 557 گۇل وسىرىلگەن قۇمىرالار جول بويىندا كوشەلەرگە كورىك بەرىپ تۇرادى»، - دەيدى ول.