جامبىل وبلىسىندا قىتايلىق كومپانيالاردىڭ قاتىسۋىمەن قۇنى 170 ميلليون دوللاردان اساتىن 14 جوبا جۇزەگە اسىرىلماق
بۇل تۋرالى بۇگىن «مەملەكەت باسشىسىنىڭ 5 ينستيتۋتتىق رەفورماسىن جۇزەگە اسىرۋ بويىنشا 100 ناقتى قادام» ۇلت جوسپارىن جۇزەگە اسىرۋ ماسەلەلەرىنە ارنالعان بريفينگ بارىسىندا جامبىل وبلىسىنىڭ اكىمى كارىم كوكىرەكبايەۆ ءمالىم ەتتى.
«قازىرگى ۋاقىتتا الەۋەتتى ينۆەستورلارمەن 26 بولاشاعى زور ينۆەستيتسيالىق جوبانى جۇزەگە اسىرۋ بويىنشا كەلىسسوزدەر جۇرگىزىلۋدە. ونىڭ ىشىندە قىتاي حالىق رەسپۋبليكاسىمەن ەكونوميكاىق ىنتىماقتاستىقتى جانداندىرۋ اياسىندا قىتايلىق كومپانيالاردىڭ قاتىسۋىمەن 14 ينۆەستيتسيالىق جوبانى جۇزەگە اسىرۋ مۇمكىنشىلىگى قاراستىرىلۋدا. جوبالاردىڭ جالپى قۇنى شامامەن 170,4 ميلليون دوللاردى قۇرايدى»، - دەدى ءوڭىر باسشىسى.
ونىڭ اتاپ وتۋىنشە، ۇلت جوسپارىن جۇزەگە اسىرۋ اياسىندا وبلىس اكىمدىگى ءسۇت، ءسۇت ونىمدەرى، سونىمەن بىرگە ەت ونىمدەرى وندىرىسىنە ستراتەگيالىق ينۆەستورلار تارتۋ بويىنشا شارالار قابىلداۋدا. ماسەلەن، جاڭازەلانديالىق «FRONTERRA» مەن دانيالىق «ARLA» كومپانيالارىمەن 40 شارۋاشىلىقتىڭ باسىن قوساتىن، ءسۇت جانە ءسۇت ونىمدەرىن قايتا وڭدەيتىن «مەركى ونىمدەرى» اتتى ءىرى ىلكى جوبانى جۇزەگە اسىرۋ قولعا الىنعان.
«تاياۋ ارالىقتا وندىرىستىك كووپەراتيۆتەر توڭىرەگىندە 70-تەن 200-گە دەيىن اسىل تۇقىمدى ءسۇتتى سيىر ۇستايتىن ءسۇتتى- تاۋارلى فەرمالار قۇرىلادى. بۇگىنگى كۇنى ءسۇت زاۋىتى سالىناتىن ۋچاسكە انىقتالىپ، تەحنيكالىق- ەكونوميكالىق نەگىزدەمەسى مەن جوبانىڭ جوبالىق- سمەتالىق قۇجاتتاماسى جاسالۋدا. بۇل جوبالاردى جۇزەگە اسىرۋ ءاربىر كووپەراتيۆتىڭ تاياۋ 5 جىلدىڭ ىشىندە تاۋلىگىنە 50 تونناعا دەيىن ءسۇتتى قايتا وڭدەۋىنە قول جەتكىزەتىن بولادى»، - دەدى ك. كوكىرەكبايەۆ.
اۆتور: مارلان جيەمباي