ول جولى قالاي ءوتتى جانە جولدا قانداي قيىندىقتارعا تاپ بولعانىن Kaz.tengritravel.kz تىلشىسىنە ءبولىستى.
«ەۋروپاعا موتوتسيكلمەن بارۋ يدەياسى ەكى جىل بۇرىن پايدا بولعان شىعار. پاندەمياعا بايلانىستى بۇل جوسپاردى شەگەرۋگە تۋرا كەلدى. مامىردىڭ سوڭىندا يدەيامدى جۇزەگە اسىرۋدى شەشتىم. ساياحاتتى جوسپارلاۋ بىرنەشە ماسەلەنى شەشۋ كەرەك دەگەندى بىلدىرەدى. ءبىرىنشىسى، ارينە، شەنگەن الۋ. ەكىنشىسى - موتوتسيكلدى ساقتاندىرۋ. ۆيزانى شامامەن ءۇش اپتا كۇتتىم. ءارى قاراي ءبىزدىڭ ەلدە ۇزاق جۇرمەۋ ءۇشىن الماتىدان اتىراۋعا موتوتسيكلدى جىبەردىم. ەۋروپادان ورالعاندا اتىراۋدان الماتىعا ءدال سولاي كەلدىم.
مەن قۇجاتتاردى يتاليا كونسۋلدىعىنا تاپسىردىم. پروتسەدۋرا ءىس جۇزىندە وڭاي ەمەس. ادەتتە ادامدار ۇشاقپەن ساياحاتتايدى. مەنىڭ جاعدايىمدا، كوپ شەكارانى كەسىپ ءوتۋدى جوسپارلاعاندىقتان، ماعان بارلىق قوناق ءۇيدى ءوز باعىتىم بويىنشا برونداۋدى سۇرادى. 17 برون جاسادىم. يتاليانى تاڭداعان سەبەبىم اپكەم ميلاندا تۇرادى. سول جەردە كوپ ۋاقىت وتكىزۋدى جوسپارلادىم.
مەن ءۇشىن تۇركيا مەن يتاليانىڭ جولدارى مەن جول بويىنداعى قىزمەتى جاقسى بولىپ كورىندى. تاماق تانۋ، جانارماي قۇيۋ، سەرگىتۋ، تۇنەۋ ورىندارى بار. تەك يتاليادا تۇركياعا قاراعاندا قىمبات. تاعى شۆەيتساريادا ءبارى قىمبات، ال ەلدىڭ ءوزى كىشكەنتاي، سوندىقتان جول بويىنداعى قىزمەت كورسەتۋ ايالدامالارى سيرەك كەزدەسەدى.
مەنىڭ باعىتىم مىناداي بولدى: اتىراۋدان استراحانعا، ودان كەيىن گروزنىيعا، سودان كەيىن ۆلاديكاۆكازعا، ودان كەيىن تبيليسيگە، باتۋميگە، ترابزونعا، سامسۋنعا، انكاراعا، يزميرگە باردىم. يزميردە گرەكياعا جەتۋ ءۇشىن پارومعا كوشتىم. كەلەسى - افينا، سودان كەيىن البانيا جانە ادرياتيكا تەڭىزى بويىندا - چەرنوگوريا، حورۆاتيا، بوسنيا جانە گەرتسەگوۆينا، سلوۆەنيا، يتاليا. مەن يتالياعا تريەست ارقىلى، سودان كەيىن ۆەنەتسيا، ميلان، بولونيا، فلورەنسيا، ريم، توسكانا، گەنۋيا، دومودوسسولا ارقىلى كەلدىم، سول جەردەن شۆەيتسارياعا كەلدىم. ول جەردە بەس كۇن تۇردىم.
وسى ۋاقىت ىشىندە مەن شۆەيتساريانىڭ استاناسىنا بارىپ، نەگىزگى كورىكتى جەرلەردى - كولدەردى، شىڭداردى، اسۋلاردى كوردىم. سودان كەيىن يتالياعا ورالدىم، دولوميت الپىسىنە باردىم. كەيىن سلوۆەنياعا باردىم، وندا موتوسيكل بۇزىلدى. ونى جوندەپ، سلوۆاكياعا، سودان كەيىن اۆسترياعا، ۆەنگرياعا، رۋمىنياعا، بولگارياعا، تۇركياعا كەتتىم. سول باعىتپەن ورالدىم.