اقتوبەدە 16 مىڭ گەكتار ەگىس القابىن كيىك تاپتاپ كەتتى
اقتوبە وبلىسىنىڭ ەگىندى اۋدانى ايتەكە بيدە القاپقا كيىك كىرىپ كەتكەن. قازىرگى كەزدە شارۋالار بار شىعىنىن ەسەپتەپ جاتىر.
«القاپتا ءدان سەبۋ جۇمىسى اياقتالعان بويدا كيىك كەلدى، كوبەيىپ كەتتى. ايتەكە بي اۋدانىنىڭ قۇمقۇدىق اۋىلىنا جانگەلدين، اقتاستى اۋىلدارى جاعىنان كەلدى دەپ ايتسام بولادى. ونى قۋىپ، كەرى قايتارعانداي بولدىق. كەزەكشىلىك تە قويدىق. ەكى بريگادا جۇمىس ىستەدى. كولىكپەن ءجۇرىپ، كۇزەتتىك. دەگەنمەن كيىك ەگىن القابىنا كىرىپ كەتتى. سول جەردە جاتتى، تاپتاپ، قازىپ تاستادى جەردى. قازىر ەگىن جيناۋ جۇمىستارى ءجۇرىپ جاتىر. ارپا ەگىلگەن ءبىر القاپتىڭ ءار گەكتارىنان 13 سەنتنەر ءونىم جينادىق. ال كيىك كىرگەن القاپتا گەكتارىنان 8 سەنتنەر ءونىم الدىق. ياعني، كيىك كىرگەن سوڭ گەكتارىنان 4 سەنتنەر جوعالتىپ تۇرمىز. بۇل ناقتى دەرەك. سوندا ءبىر ءتورتبۇرىش ىشىنەن، ياعني، القاپتان شامامەن 200 توننا جوعالتتىق. ءار تونناسى 60 مىڭ دەسەك، ءبىز 12 ميلليون تەڭگەدەن ايىرىلىپ وتىرمىز. سونىمەن بىرگە كيىك جۇرگەن جەردەگى القاپتىڭ گەكتارىنان 4 سەنتنەر بيداي جينالدى. تاپتالماعان جەرىندە گەكتارىنان 8-9 سەنتنەر الدىق. ءبارىن قۋىپ ءجۇرۋ مۇمكىن ەمەس. ءبىزدىڭ بريگادا 12-13 شاقىرىم جەرگە دەيىن قۋدى، ولار ءاپ- ساتتە قايتىپ كەلەدى. ونى اتۋعا، ۇرۋعا بولمايدى. شارۋالار كيىكتەن وزگە شەگىرتكەمەن دە كۇرەس جۇرگىزدى. قازىر دە قيىن. 25-تامىزدان بەرى جاڭبىر جاۋىپ تۇر. بۇل دا كەدەرگى كەلتىرىپ تۇر ورۋ جۇمىستارىنا. ءبىز كوميسسيا كەلىپ، شىعىندى قاراۋىن سۇرايمىز»، - دەدى «قۇمقۇدىق» ج ش س ديرەكتورى الەكساندر چەمودانوۆ.
جالپى اقتوبە وبلىسىنىڭ ايتەكە بي، قوبدا اۋداندارىندا اۋىل شارۋاشىلىعى ماقساتىنداعى جەرلەردى كيىك تاپتادى.
«ايتەكە بي اۋدانىنىڭ قۇمقۇدىق، سارات، سۇلۋكول، اقتاستى اۋىلدىق وكرۋگتەرى مەن قوبدا اۋدانىڭ وتەك اۋىلىندا تىركەلدى. بارلىعى 16 مىڭ گەكتارعا جۋىق جەر. شارۋالار ءۇشىن ەگىس القابىن ساقتاۋ قيىندىق تۋعىزدى. ولار قارجىلىق جاعدايىنا اسەر ەتەتىنىن حابارلادى. مينيسترلىككە حابار بەرىلدى»، - دەدى اقتوبە وبلىستىق اۋىل شارۋاشىلىعى جانە جەر قاتىناستارى باسقارماسىنىڭ ءبولىم باسشىسى نۇربەك رايىمبايەۆ.
اقتوبە وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنىڭ باسشىسى ادىلكەرەي اۋەلبايەۆ تاراتقان اقپاراتقا سۇيەنسەك، وبلىستا بەتپاقدالا جانە ءۇستىرت پوپۋلياتسياسى بار. بەتپاقدالا پوپۋلياتسياسىندا 100 مىڭ، ۇستىرتتە 30 مىڭ باس كيىك تىركەلدى. ال قوبدا اۋدانى مەن رەسەيمەن شەكارالاس اۋماقتاعى ورال كيىك پوپۋلياتسياسىندا 4 مىڭ باس كيىك كەزدەسەدى. ينسپەكتورلار كيىك مەكەندەيتىن اۋدانداردا جانۋاردىڭ ميگراتسياسى تۋرالى اقپارات بەرگەن.