مەملەكەتتىك ساتىپ الۋدا 16 ميلليارد تەڭگەگە باعانى قولدان ءوسىرۋ جايتى انىقتالدى
سونىمەن قاتار 12 قىلمىستىق ءىس قوزعالدى.
بۇل تۋرالى «ەل نامىسى» ارنايى مونيتورينگىلىك توبىنىڭ مۇشەسى ديدار سماعۇلوۆ ءمالىم ەتتى، دەپ حابارلايدى قازاقپارات ءتىلشىسى.
«ءبىزدىڭ قوعامدىق ۇيىم جۇمىسىن باستاعالى ەلىمىزدە 13,5 مىڭنان استام ازاماتتىڭ قاتىسۋىمەن 500 دەن استام كەزدەسۋ ءوتتى. ونىڭ ىشىندە 615 ازاماتتىڭ ماسەلەسى جەكە قارالدى. ءار ازاماتتىڭ ءوتىنىشى مەن ماسەلەسىنە ءتيىستى كەڭەس بەرىلىپ، قۇزىرلى ورگاندارعا حات جولداندى. كەيبىر جايتتار سول جەردە شەشىمىن تاۋىپ جاتتى. قازىر قولىمىزدا بار مالىمەتكە سايكەس، شەنەۋنىكتەرگە قاتىستى 145 اكىمشىلىك جاۋاپقا تارتۋ حاتتاماسى تولتىرىلدى. سالىنعان جالپى ايىپپۇل كولەمى 40 ميلليون تەڭگەدەن اسادى. زاڭبۇزۋشىلىققا كەلسەك، جاۋاپقا تارتىلعان شەنەۋنىكتەر نەمەسە مەملەكەتتىك قىزمەتكەرلەردىڭ جارتىسى نەگىزگى جۇمىسىنان بولەك، كاسىپكەرلىكپەن اينالىسقان»، - دەدى ديدار سماعۇلوۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
مونيتورينگىلىك توپ مۇشەسىنىڭ مالىمەتىنشە، قوعامدىق باقىلاۋ بارىسىندا مەملەكەتتىك ساتىپ الۋ سالاسىندا دا زاڭبۇزۋشىلىقتار انىقتالدى.
«جوعارىدا اتالعان 145 حاتتامانىڭ 40 ى - مەملەكەتتىك ساتىپ الۋعا قاتىستى. ناتيجەسىندە 16 ميلليارد تەڭگەدەن استام سوماعا مەملەكەتتىك ساتىپ الۋ باعاسىن قولدان ءوسىرۋ جايتى انىقتالىپ، 12 قىلمىستىق ءىس قوزعالدى. مىسالى، اقتوبە قالاسىنداعى سپورت مەكتەبى ديرەكتورىنىڭ ورىنباسارى نەگىزگى جۇمىسىنان بولەك جەكە كاسىپكەر رەتىندە مەملەكەتتىك ساتىپ الۋمەن اينالىسقان. ءسويتىپ، باسقا سپورتتىق مەكتەپتەرگە قىزمەتىن ۇسىنىپ كەلگەن. ناتيجەسىندە ايىپتىنىڭ زاڭسىز تابىسى تاركىلەنىپ، وعان 428 مىڭ تەڭگە ايىپپۇل سالىندى. سونىمەن قوسا اتالعان ازامات مەملەكەتتىك ساتىپ الۋمەن قاتار، جەتكىزۋشى ءرولىن دە اتقارعان»، - دەيدى ول.
بۇعان دەيىن تەمىرتاۋلىق تەرگەۋشىنىڭ قىلمىستىق ءىستى توقتاتۋ ءۇشىن كۇدىكتىدەن اقشا العانى تۋرالى حابارلاعان ەدىك.
ايتا كەتەيىك، بيىل جىل باسىندا ەلىمىزدە «ەل نامىسى» اتتى ارنايى مونيتورينگىلىك توپ قۇرىلدى.
اتالعان قوعامدىق ۇيىمنىڭ ماقساتى - پرەزيدەنت تاپسىرمالارىنىڭ ورىندالۋ بارىسىن باقىلاۋ.