اتاۋلى كۇندەر
يۋنەسكو- نىڭ تۋعان كۇنى
وسىدان 75 جىل بۇرىن 1945-جىلى 16- قاراشادا بىرىككەن ۇلتتار ۇيىمىنىڭ ءبىلىم، عىلىم جانە مادەنيەت ماسەلەلەرى جونىندەگى ۇيىمى قۇرىلدى. ءدال وسى كۇنى لوندوندا وتكەن كونفەرەنتسيادا ونىڭ جارعىسى قابىلدانىپ، وعان 37 مەملەكەت قول قويدى.
توزىمدىلىكتىڭ (تولەرانتتىقتىڭ) حالىقارالىق كۇنى
«توزىمدىلىك پرينتسپتەرى دەكلاراتسياسىن» جاريالاۋ اياسىندا 1995-جىلى يۋنەسكونىڭ 28-باس كونفەرەنتسياسىندا مەرەكە بولىپ جاريالاندى.
1997 -جىلى بىرىككەن ۇلتتار ۇيىمىنىڭ باس اسسامبلەياسى وسى ۇيىمعا مۇشە ەلدەرگە بۇل مەرەكەنى اتاپ ءوتۋدى ۇسىندى.
«توزىمدىلىك پريتسپتەرى دەكلاراتسياسىندا» توزىمدىلىك نەمەسە تولەرانتتىلىق دەگەن تۇسىنىك الەمدەگى مادەنيەتتىڭ باي الۋان تۇرلىلىگىنە، سونداي-اق ادامداردىڭ ءوز بولمىسىن كورسەتۋ تۇرلەرىنە قۇرمەت دەپ تۇسىندىرىلەدى. ءار ادام دەكلاراتسياعا سايكەس، ءوز تابيعاتى بويىنشا ەرەكشەلەنەتىنىن، سونداي-اق ءوزىنىڭ جەكە باسىن ساقتاۋعا جانە ءومىر سۇرۋگە بىردەي قۇقىلى ەكەنىن مويىنداۋى ءتيىس.
ەستە قالار وقيعالار
1993 -جىلى گەرمانياداعى نيۋرنبەرگ قالاسى ەكونوميكالىق دامۋ جانە ماركەتينگ گيلدياسىنىڭ ۇلكەن التىن مەدالى قازاقستان پرەزيدەنتى نۇرسۇلتان نازاربايەۆقا بەرىلدى.
2001 -جىلى قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ پەن وزبەكستان رەسپۋبليكاسىنىڭ پرەزيدەنتى يسلام كاريموۆ قازاقستان مەن وزبەكستاننىڭ مەملەكەتتىك شەكاراسى تۋرالى كەلىسىمگە قول قويدى.
2005 -جىلى اقمولا وبلىسىنىڭ اقكول قالاسىندا «رەسپۋبليكالىق عارىشتىق بايلانىس جانە راديوەلەكتروندى قۇرالداردىڭ ەلەكتروماگنيتتىك ۇيلەسىم ورتالىعى» ا ق ۇيىمداستىرعان ءبىرىنشى عارىشتىق اپپاراتتاردى جەرۇستى باسقارۋ كەشەنىنىڭ تانىستىرىلىمى ءوتتى.
2007 -جىلى الماتى وبلىسى سارقان قالاسىندا اتى اڭىزعا اينالعان تەمىرجولشى، تۇركسىبتىڭ شوقپار نۇسقاسىنداعى جوباسىنىڭ اۆتورى مەن ورىنداۋشىسى مۇحامەدجان تىنىشبايەۆقا ەسكەرتكىش قويىلدى.
سالتاناتتى بولىمنەن كەيىن وبلىس اكىمى، اتى اڭىزعا اينالعان تەمىرجولشىنىڭ ۇرپاعى جانە ساياسي قايراتكەرلەر ەسكەرتكىش جانىنا اعاش وتىرعىزدى.
2009 -جىلى الماتىداعى قازاقستان رەسپۋبليكاسىنىڭ ۇلتتىق كىتاپحاناسىندا بەلگىلى قازاق اقىنى ءابدىلدا تاجىبايەۆتىڭ 100 جىلدىعىنا ارنالعان پوشتا ماركاسىنىڭ تانىستىرىلىمى ءوتتى. شاراعا اقىننىڭ تۋىستارى، ارىپتەستەرى اقىن-جازۋشىلار قاتىسىپ، ەستەلىكتەرىمەن ءبولىستى.
2009 -جىلى بەلارۋستا قازاقستان ستۋدەنتتەرىنىڭ كەڭەسى قۇرىلدى. كەڭەستىڭ نەگىزگى ماقساتى - بەلارۋستا شوعىرلانعان قازاقستاندىق ستۋدەنتتەر قاۋىمداستىعىن قالىپتاستىرۋ.
2011 -جىلى تاجىكستاننىڭ حاتلون وبلىسىنىڭ ورتالىعى قورعانتوبە (2018-جىلى بوحتار بولىپ وزگەرتىلدى) قالاسىنداعى كوشەنىڭ ءبىرىن «قازاحون» كوشەسى (قازاق كوشەسى) دەپ اتاۋعا بايلانىستى سالتاناتتى شارا ءوتتى. ول كوشەدە ەتنيكالىق قازاقتار تۇرىپ كەلە جاتىر.
2015 -جىلى نورۆەگيا كورولدىگىندە قازاقستان رەسپۋبليكاسىنىڭ قۇرمەتتى كونسۋلدىعى اشىلدى.
2015 -جىلى لوندوندا مەملەكەت باسشىسى نۇرسۇلتان نازاربايەۆتىڭ سويلەگەن سوزدەرىنىڭ جيناعى «Leadership Perspectives» كىتابى جارىق كوردى. كىتاپ ق ر پرەزيدەنتى نۇرسۇلتان نازاربايەۆتىڭ 2012-جىلدان 2015-جىلعا دەيىنگى ارالىقتا حالىقارالىق ساياساتتىڭ وزەكتى پروبلەمالارى، قازاقستاندى جاڭعىرتۋ مەن ەكونوميكالىق دامىتۋ، ينستيتۋتسيونالدىق رەفورمالار سەكىلدى كوپتەگەن وزەكتى ماسەلەلەر تۋرالى سويلەگەن سوزدەرى مەن باياندامالارىن قامتيدى.
جيناققا ۇلت كوشباسشىسىنىڭ كۇندەلىكتى قىزمەتىن كورسەتەتىن 30 دان استام فوتوسۋرەت ەنگەن، سونىڭ 18 ءى شەت مەملەكەتتەر باسشىلارىمەن كەزدەسۋ كەزىندە تۇسىرىلگەن.
2016 -جىلى «قازپوشتا» ريو-دە-جانەيروداعى وليمپيادا ويىندارىنىڭ جۇلدەگەرلەرىنە ارنالعان ماركالار شىعاردى. پوشتا ماركالارىنا 2016-جىلى برازيليانىڭ ريو-دە-جانەيرو قالاسىندا وتكەن 31-وليمپيادا ويىندارىنىڭ التىن جانە كۇمىس جۇلدەگەرلەرى: وليمپيادا چەمپيوندارى - دانيار ەلەۋسىنوۆ، دميتري بالاندين جانە نيجات راحيموۆتىڭ؛ كۇمىس مەدال يەگەرلەرى - گۇزەل مانيۋروۆا، جازيرا جاپپارقۇل، ۆاسيلي لەۆيت، ەلدوس سمەتوۆ جانە ادىلبەك نيازىمبەتوۆتىڭ بەينەسى ءتۇسىرىلدى. ماركالار 40 مىڭ دانامەن شىعارىلدى. نومينالى - 200 تەڭگە.
2017 -جىلى جاپونيادا «رۋحاني جاڭعىرۋ» باعدارلاماسىنىڭ حالىقارالىق تۇساۋكەسەرى اياسىندا توكيونىڭ ورتالىق كىتاپحاناسىندا قازاقستان ادەبيەتى مەن مادەنيەتى ورتالىعى اشىلدى. قازاقستان ادەبيەتى مەن مادەنيەتى ورتالىعىنىڭ اشىلۋى توكيو قالالىق ورتالىق كىتاپحاناسىنىڭ وقىرماندارىنا قازاق حالقىنىڭ سالت-داستۇرىمەن، جازۋىمەن جانە مادەنيەتىمەن جاقىنىراق تانىسۋعا مۇمكىندىك بەرەدى.
بۇل - قازاقستاننىڭ جەتىستىكتەرى، ەكونوميكاداعى، ساياساتتاعى، الەۋمەتتىك سالاداعى تابىستارى تۋرالى ادەبيەت ارقىلى بايانداۋدىڭ تاماشا مۇمكىندىگى.