قازاقستان ارقىلى وتەتىن پويىز نيدەرلاندىدان قىتايعا 16 كۇندە جەتەدى
10:16, 08 - ناۋرىز 2018
امستەردام. قازاقپارات - سارسەنبى كۇنى امستەردامدا «ءبىر بەلدەۋ، ءبىر جول» باستاماسى اياسىندا نيدەرلاندىدان قىتايعا العاشقى جۇك پويىزى اتتاندى، دەپ حابارلايدى قازاقپارات ءتىلشىسى.
گوللانديالىق Nunner Logistics كولىكتىك- لوگيستيكالىق كومپانياسىنا تيەسىلى تاۋارلار قازاقستان ارقىلى 16 كۇندە 11 مىڭ شاقىرىم قاشىقتىقتى ارتقا تاستاپ، قىتايدىڭ شىعىسىنداعى يۆۋ قالاسىنا جۇك جەتكىزىلەدى.
41 جۇك كونتەينەرى تيەلگەن پويىزى قىتايعا مينەرالدى تىڭايتقىشتار، فارماتسەۆتيكالىق ونىمدەر، مەديتسينالىق پرەپاراتتار، وپتيكالىق قۇرىلعىلار جانە تەحنيكالىق قۇرال- جابدىقتار تاسىمالدايتىن بولادى.
«قازاقستاننىڭ ءوز ترانزيتتىك- كولىكتىك الەۋەتىن دامىتۋى، ترانسقۇرلىقتىق قاتىناستا نەگىزگى بۋىنعا اينالۋى ءبىز ءۇشىن وتە ماڭىزدى»، - دەپ اتاپ ءوتتى نيدەرلاندىداعى ق ر ەلشىسى ماعجان ءىلياسوۆ.
اپتا سايىن امستەردامنان يۆۋ قالاسىنا 3 پويىز جىبەرىلەدى. 2020 -جىلعا قاراي ەۋروپادان قىتايعا اتتاناتىن پويىزدار سانى بەس مىڭعا جەتپەك.