الماتىدا 16 مىڭ شەتەلدىك ازامات اكىمشىلىك جاۋاپكەرشىلىككە تارتىلدى
«جىل باسىنان بەرى ميگراتسيالىق زاڭنامانى بۇزعان 16 مىڭ شەتەلدىك ازامات اكىمشىلىك جاۋاپكەرشىلىككە تارتىلدى. ەلدىڭ تەرريتورياسىنان 222 شەتەلدىك سىرتقا شىعارىلسا، 1 مىڭ 700 شەتەلدىك اكىمشىلىك قاماۋعا الىندى.
ءى ءى د قابىلداۋ بولىمىنە 1600 شەتەلدىك قامالدى. سونىمەن قاتار ميگراتسيالىق اعىندى رەتتەۋ ماقساتىندا ميگراتسيالىق پوليتسيا بولىمشەلەرىمەن 2210 ەڭبەك ميگرانتىنا قازاقستان تەرريتورياسىندا ەڭبەك ەتۋگە رۇقسات بەرىلگەن. رۇقسات ۇيدە جۇمىس جاسايتىن، 3 ايدان ارتىق ۆيزاسىز رەجيم تۋرالى كەلىسىمگە قول قويىلعان ەلدىڭ ازاماتتارىنا بەرىلەدى»، - دەدى قالالىق ءى ءى د ميگراتسيالىق پوليتسيا باسقارماسىنىڭ باسشىسى اسحات بۇتىنشيەۆ.
قالاداعى قىلمىستىق احۋالعا ميگراتسيالىق پروتسەستەر دە ىقپالىن تيگىزۋدە. اسىرەسە، سوڭعى جىلدارى الماتىعا ءناپاقا ىزدەپ كەلگەن شەتەلدىكتەردىڭ سانى 17 پايىزعا ارتتى.
ونىڭ ايتۋىنشا، تىركەلىپ جاتقان قىلمىستاردىڭ كوبىن سول كەلىمسەكتەر جاساۋدا. قىلمىستىق جاۋاپكەرشىلىككە تارتىلعانداردىڭ 40 پايىزى وزگە قالادان كەلگەندەر، ولاردىڭ 4 پايىزى شەتەلدىك ازاماتتار ەكەندىگى بەلگىلى.
قازىر قالاداعى كوشى-قون زاڭناماسىنىڭ بۇزىلماۋىن قاداعالاۋ ءۇشىن 28 قوناق ۇيدە شەتەلدىك ازاماتتاردى قابىلداۋ پۋنكتتەرى اشىلعان.
اۆتور: گۇلميرا ءعوسمانالي