بيىل 15 شەتەل فيلمى قازاق تىلىندە سويلەيدى
«قازىر قازاق تىلىندەگى كينوكونتەتكە سۇرانىس وتە زور. بۇل رەتتە، مينيسترلىك قازاق تىلىنە دۋبلياجداناتىن شەتەلدىك بلوكباستەرلەردىڭ سانىن جىل سايىن ارتتىراتىن بولدى 2023 -جىلى 15 فيلمدى دۋبلياجداۋ جوسپارلانعان»، - دەلىنگەن مادەنيەت جانە سپورت مينيسترلىگىنىڭ «قازاقپارات» اگەنتتىگىنە بەرگەن جاۋابىندا.
كەيىنگى 5 جىل ىشىندە «مەلومان» كومپانياسى Disney جانە Sony pictures كينوكومپانيالارىنىڭ 17 فيلمىن دۋبلياجدادى. سونىڭ ىشىندە، مەملەكەتتىك قولداۋدىڭ ارقاسىندا «اۆاتار» (ءبىرىنشى ءبولىم)، «قارا قابىلان: ۆاكاندا جاساسىن!» جانە «اۆاتار. سۋ جولى» فيلمدەرى قازاق تىلىنە دۋبلياجداندى.
«كينەماتوگرافيا تۋرالى» 2019 -جىلعى 3-قاڭتارداعى زاڭىنا سايكەس، پروكاتۇا شىعۋى شەكتەۋلى فيلمدەردى قوسپاعاندا، قازاقستان اۋماعىندا كينوزالدار مەن وسى ماقساتتارعا ارنالعان وزگە دە ورىنداردا پروكاتتالۋى جانە كورسەتىلۋى قازاق تىلىندە جۇزەگە اسىرىلمايتىن فيلمدەر مەملەكەتتىك تىلدە دۋبلياج جاسالۋعا نەمەسە سۋبتيترلەنۋگە، سونداي-اق كادر سىرتىنداعى اۋدارمامەن قامتاماسىز ەتىلۋگە ءتيىس. اتالعان زاڭنىڭ 13-بابىنىڭ 5-تارماعى 2-تارماقشاسىنا سايكەس، «ۇلتتىق كينونى قولداۋ مەملەكەتتىك ورتالىعى» كوممەرتسيالىق ەمەس اكسيونەرلىك قوعامى قازاقستان اۋماعىنا اكەلىنەتىن بالالار انيماتسيالىق فيلمدەرى مەن وتباسىمەن كورۋگە ارنالعان فيلمدەردى قازاق تىلىندە دۋبلياجداۋدى قارجىلاندىرۋ جونىندەگى ءبىرىڭعاي وپەراتورى سانالادى»، - دەپ اتالىپ وتكەن ۆەدومستۆو مالىمەتىندە.
فيلمدەردى قازاق تىلىنە دۋبلياجداۋدى قارجىلاندىرۋ تۋرالى شەشىمدى ۋاكىلەتتى ورگان ساراپتاما كەڭەسىنىڭ وڭ قورىتىندىسى جانە ۇلتتىق فيلمدەردى مەملەكەتتىك قارجىلىق قولداۋ ماسەلەلەرى جونىندەگى ۆەدومستۆوارالىق كوميسسيانىڭ ۇسىنىمى نەگىزىندە قابىلدايدى. 2023 -جىلعى 10-ناۋرىزدا مادەنيەت جانە سپورت ءمينيسترىنىڭ «قازاقستان رەسپۋبليكاسىنىڭ اۋماعىنا اكەلىنەتىن بالالار انيماتسيالىق فيلمدەرى مەن وتباسىمەن كورۋگە ارنالعان فيلمدەردى قازاق تىلىندە دۋبلياجداۋ ءۇشىن ىرىكتەۋ قاعيدالارىن بەكىتۋ تۋرالى» №72-بۇيرىعى قابىلداندى. اتالعان بۇيرىق قازاقستان رەسپۋبليكاسىنىڭ اۋماعىنا اكەلىنەتىن بالالار انيماتسيالىق فيلمدەرى مەن وتباسىمەن كورۋگە ارنالعان فيلمدەردى قازاق تىلىندە دۋبلياجداۋ ءۇشىن ىرىكتەۋ ءتارتىبىن ايقىندايدى.
بۇدان بۇرىن حابارلانعانداي، بىلتىر جالپى كينوپروكاتتاعى وتاندىق فيلمدەردىڭ ۇلەسى شامامەن 14,5 پايىزدى قۇرادى.