بۇل تۋرالى ۇكىمەتتىڭ كەڭەيتىلگەن وتىرىسىندا ق ر پرەزيدەنتى ايتتى، دەپ حابارلايدى قازاقپارات اقوردانىڭ باسپا ءسوز قىزمەتىنىڭ تەلەگرامداعى بورت№1 ارناسىنا سىلتەمە جاساپ.
«ەندى ينۆەستيتسيا ساياساتىنا كەلەيىك. مەنىڭ تاپسىرماممەن ينۆەستيتسيالىق جوبالاردىڭ ءبىرىڭعاي جۇيەسى ازىرلەندى. الايدا بيىل جوسپارداعى 284 ينۆەستيتسيالىق جوبانىڭ 43 ى عانا جۇزەگە اسىرىلعان. ياعني، نەبارى 15 پايىزى ىسكە قوسىلعان. مۇنىڭ بارىنە قۇر سيفر رەتىندە قاراۋعا بولمايدى. ويتكەنى سونىڭ كەسىرىنەن كوپتەگەن جۇمىس ورنى اشىلماي قالدى.
ەل ەكونوميكاسى ميللياردتاعان تەڭگە قارجىدان قاعىلدى. سىرتقى ىستەر مينيسترلىگى شەتەلدەن ينۆەستور تارتۋ ءۇشىن ءتيىمدى جۇمىس اتقارىپ جاتقانىن اتاپ وتكەن ءجون. ەلشىلەر شەتەلدەردە ءتۇرلى كەزدەسۋ وتكىزىپ، ەلىمىزگە ينۆەستورلاردى جەتەلەپ اكەلەدى دەۋگە بولادى. ءبىراق جوبانى جۇزەگە اسىراتىن كەزدە جەرگىلىكتى جەردە ءتۇرلى ماسەلە تۋىندايدى. ءبىر سوزبەن ايتساق، ءبىز دايىن ينۆەستورلاردان ايىرىلىپ قالىپ جاتىرمىز.
تاعى دا قايتالاپ ايتامىن، ينۆەستيسيالىق جوبالاردى جۇزەگە اسىرۋعا جاعداي جاساۋ ياعني، جەر ءبولۋ، رۇقساتناما بەرۋ، ينفراقۇرىلىممەن قامتۋ - اكىمدەردىڭ مىندەتى. ارينە، ورتالىققا دا وزگەرىس جاساۋ كەرەك. وسىعان قاتىستى ءبىرقاتار ۇسىنىس بار ەكەنىن بىلەمىن.
پرەمەر-مينيستر ەكونوميكالىق ساياسات جونىندەگى كەڭەستە ءبارىن قايتادان تالقىلاپ، ءوزارا كەلىسىلگەن شەشىمدى ماعان ەنگىزۋى قاجەت»، - دەدى پرەزيدەنت.